کووڈ 19 کی عالمی وبا کے چینی لیب سے آغاز کا ثبوت نہیں ملا، امریکی انٹیلیجنس رپورٹ

امریکا میں عام کی جانے والی ایک خفیہ رپورٹ کے مطابق امریکی انٹیلیجنس ایجنسیوں کو اس بات کا کوئی براہ راست ثبوت نہیں ملا کہ کووڈ 19 کی وبا کا آغاز چین کے ووہان انسٹی ٹیوٹ آف وائرولوجی سے ہوا تھا۔

ڈائریکٹر آف نیشنل انٹیلیجنس (ODNI) کے دفتر کی جانب سے جاری کردہ چار صفحات پر مشتمل رپورٹ میں کہا گیا ہے کہ امریکی انٹیلی جنس کمیونٹی ابھی تک اس ہلاکت خیز وائرس کے لیبارٹری سے جنم لینے کے خدشات کو یکسر مسترد نہیں کر سکی ہے تاہم اس عالمی وبا کے آغاز کی دریافت میں بھی کامیاب نہیں ہو سکی۔

او ڈی این آئی کی رپورٹ میں کہا گیا ہے کہ سینٹرل انٹیلیجنس ایجنسی سمیت ایک اور ایجنسی کووڈ 19 وبائی مرض کے اصل آغاز کا تعین کرنے سے قاصر رہی ہیں، کیونکہ عالمی وبا سے متعلق قدرتی اور لیب سے جنم لینے کے دونوں مفروضے دیگر اہم قیاس آرائیوں پر انحصار یا متضاد رپورٹنگ کے چیلنجوں کا سامنا کرتے ہیں۔

رپورٹ میں کہا گیا ہے کہ ووہان انسٹی ٹیوٹ آف وائرولوجی میں کورونا وائرس پر وسیع پیمانے پر کام کیا گیا تھا، لیکن ایجنسیوں کو کسی خاص واقعے کے شواہد نہیں ملے جو ممکنہ طور پر اس وبا کا باعث بن سکتا تھا۔

’ہمیں ابھی تک اس بات کا کوئی اشارہ نہیں ملا ہےکہ ووہان انسٹی ٹیوٹ کی قبل از کووڈ وبا تحقیق میں سارس کووڈ 2 یا اس سے مماثلت رکھتا کوئی پروجنیٹر شامل تھا، اور نہ ہی کوئی براہ راست ثبوت ہے کہ اس عالمی وبا سے ووہان انسٹی ٹیوٹ کے عملہ کو متاثر کرتا ہوا تحقیق سے جڑا کوئی قابل ذکر واقعہ پیش آیا ہو، جو کووڈ کا باعث بن سکتا ہو۔‘

امریکی انٹیلیجنس حکام کو قانون سازوں کی جانب سے کووڈ 19 کی آغاز اور پھیلاؤ کے بارے میں مزید مواد جاری کرنے پر زور دیا گیا ہے، لیکن انہوں نے بار بار استدلال کیا ہے کہ چین میں آزادانہ جائزوں کی راہ میں حائل سرکاری رکاوٹوں نے اس بات کا تعین کرنا شاید ناممکن بنا دیا ہے کہ وبائی بیماری کیسے شروع ہوئی۔

کووڈ 19 کی وبا سے متعلق اس حالیہ رپورٹ سے ریپبلکن پارٹی سے وابستہ قانون سازوں کی ناراضی کا امکان ہے جن کا موقف ہے کہ امریکی انتظامیہ غلط طور پر اس ضمن میں معلومات کو خفیہ رکھتے ہوئے ان محققین کو روک رہی ہے جو امریکا پر اس حوالے سے ہچکچاہٹ کا الزام عائد کرتے رہے ہیں۔