مشرقی ومغربی سرحدوں پر تعینات افواج پاکستان کے بہادر اور جَری جوان عید کے موقعے پر بھی اپنوں سے دور دفاعِ وطن کے لیے ملک دشمنوں کے سامنے سینہ سپر ہیں۔
پاک آرمی کے یہ محافظ سیاچن کے برف پوش پہاڑوں سے لے کر بلوچستان کی سنگلاخ چٹانوں تک، سندھ کے تپتے صحرائوں سے لے کر وزیرستان کے پہاڑوں تک اپنی عیدیں سرحدوں کی حفاظت کے لیے قربان کرتے ہیں اور آج الحمداللہ پاکستان میں مجموعی طور پر امن کی فضا انہی کی مرہون منت ہے۔
سر زمین شمالی وزیرستان سے پاک فوج کے آفیسرز اور جوانوں کی جانب سے عید الاضحیٰ کے پر مسرت موقع پر خصوصی پیغام میں کہا گیا کہ ’پاکستانی قوم کو عید کی خوشیاں مبارک، ہم اپنی قوم کی خوشیوں کی حفاظت کے لیے ہمہ وقت تیار ہیں‘۔
ان کا کہنا ہے کہ شمالی وزیرستان کی زرخیز سرزمین بہت سی قربانیوں سے حاصل کی گئی ہے جس میں پاک فوج کے آفیسرز اور جوانوں کا خون شامل ہے۔
بیان میں کہا گیا کہ پاکستانی قوم عید کی خوشیاں بھر پور طریقے سے منائے کیوں کہ پاک فوج کے جوان ان کی حفاظت کے لیے ہر دم تیار کھڑے ہیں۔ ’ہم عید کے موقع پر اپنی ڈیوٹی پر ہیں اور ایسی بہت سی عیدیں قوم کی حفاظت کے لیے قربان کرنے کے لیے تیار ہیں‘۔
دریں اثنا سندھ رینجرز کا کہنا ہے کہ پاکستان رینجرز پاک فوج کے ساتھ مل کر ملکی سرحدوں کی حفاظت کو اپنا فخر سمجھتے ہیں اور رینجرز اور پاک فوج کی قربانیوں اور راتوں کو جاگ کر وطن کی حفاظت کرنے کی بدولت ہی ہماری قوم شہروں میں سکون سے عید مناتی ہے۔ ان کا یہ بھی کہنا ہے کہ انہیں بہت اچھا لگ رہا ہے کہ وہ اپنے ملک کی سرحدوں کی حفاظت پر معمور ہیں اور یہ عید کیا، ہم وطنِ عزیز کی خاطر ایسی ہزاروں عیدیں قربان کرنے کو تیار ہیں۔
عید کے پر مسرت موقع پر دفاعِ وطن کے محافظوں کو خراجِ تحسین پیش کرنا ہر پاکستانی کا قومی فریضہ ہے۔
