وفاقی وزیر صحت عبدالقادر پٹیل کے خلاف عمران خان کی درخواست پر کارروائی شروع

چیئرمین تحریک انصاف عمران خان نے وفاقی وزیر صحت عبدالقادر پٹیل کی طرف سے جاری کردہ میڈیکل رپورٹ پر پریس کانفرنس کرنے پر وفاقی وزیر صحت کے خلاف قانونی کارروائی کا آغاز کر دیا، عدالت نے وفاقی وزیر کو نوٹس جاری کر دیے۔

چیئرمین تحریک انصاف عمران خان نے لاہور کے ایڈیشنل ڈسٹرکٹ جج کی عدالت میں وفاقی وزیر عبدالقادر پٹیل کے خلاف 10 ارب ہرجانے کا کیس دائر کر دیا ہے، جبکہ عدالت نے عبدالقادر پٹیل کو نوٹس جاری کر دیے۔

مقدمے پر کارروائی کا آغاز عمران خان کے وکیل بیرسٹر ابوذرسلمان خان نیازی کی جانب سے دائر درخواست پر کیا گیا، فاضل ایڈیشنل ڈسٹرکٹ جج لاہور قمر عباس نے بیرسٹر ابوذر سلمان خان نیازی کے دلائل سننے کے بعد عبدالقادر پٹیل کو نوٹس جاری کیا۔

درخواست میں مؤقف اختیار کیا گیا ہے کہ عبدالقادر پٹیل نے 26 مئی کی پریس کانفرنس میں چیئرمین تحریک انصاف عمران خان کے خلاف بیہودہ گوئی اور جھوٹا پراپیگنڈا کیا تھا، اپنی پریس کانفرنس میں جھوٹے، بے بنیاد اور لغو الزامات لگانے پر چیئرمین تحریک انصاف نے عبدالقادر پٹیل کو 10 ارب ہرجانے کا نوٹس بھجوایا تھا۔

عمران خان کی قانونی ٹیم نے وفاقی وزیر عبدالقادر پٹیل کے شواہد بھی عدالت میں جمع کروا دیے ہیں۔

درخواست میں عدالت سے وفاقی وزیر عبدالقادر پٹیل سے 10 ارب کے ہرجانے کی ادائیگی اور چیئرمین تحریک انصاف سے کھلے عام غیر مشروط معافی مانگنے کے احکامات صادر کرنے کی استدعا کی گئی ہے۔