لاہور سمیت پنجاب کے کئی شہروں میں گزشتہ رات سے شروع ہونے والا بارش کا سلسلہ وقفے وقفے سے جاری ہے، جس سے کئی علاقے زیر آب آ گئے ہیں۔ لاہور میں موسلا دھار بارش سے 30سالہ ریکارڈ ٹوٹ گیا ہے۔
ایسے میں سوشل میڈیا پر متحرک رہنے والے پاکستانی فاسٹ بالر شاہنواز دھانی جو سوشل میڈیا پر کافی متحرک رہتے ہیں، نے نیشنل کرکٹ اکیڈمی کے باہر بنائی گئی اپنی ایک تصویرٹویٹ کی جس میں انہیں پانی میں چلتے ہوئے دیکھا جا سکتا ہے۔ تصویر کے ساتھ انہوں نے وزیرِ خارجہ بلاول بھٹو کا ماضی میں دیا گیا مشہور زمانہ جملہ بھی لکھا ’جب زیادہ بارش ہوتی ہے تو زیادہ پانی آتا ہے‘۔
شاہنواز دھانی کی ٹویٹ سوشل میڈیا پر وائرل ہوتے ہی صارفین نے اس پر دلچسپ تبصرے شروع کر دیے لیکن فاسٹ بالر نے چند گھنٹوں بعد ہی اپنی ٹویٹ ڈیلیٹ کر دی۔
واضح رہے کہ ماضی میں پاکستان پیپلز پارٹی کے چیئرمین بلاول بھٹو نے ایک بیان میں کہا تھا کہ جب زیادہ بارش ہوتی ہے تو زیادہ پانی آتا ہے۔ اور سابق وزیراعظم عمران خان نے2019 میں سندھ میں بارشوں کے باعث ہونے والے نقصانات کے بعد بلاول بھٹو زرداری کے اس بیان کا مذاق اُڑاتے ہوئے کہا تھا کہ بلاول بھٹو نے جو تھیوری دی ہے، اس پر آئن اسٹائن کی روح بھی تڑپ اٹھی ہے کہ جب بارش ہوتی ہے تو پانی آتا ہے اور جب زیادہ بارش ہوتی ہے تو زیادہ پانی آتا ہے۔
