ایف آئی اے سائبر کرائم سرکل ایبٹ آباد نے خاتون کو جنسی طور پر ہراساں کرنے پر اسلامک سینٹر کے سربراہ کو گرفتار کر لیا ہے۔
ایف آئی اے سائبر کرائم سرکل ایبٹ آباد نے متاثرہ خاتون کی شکایت پر کارروائی کر تے ہوئے بلیک میلنگ اور جنسی طور پر ہراساں کرنے والے ملزم زاہد اقبال کو ایبٹ آباد سے گرفتار کیا ہے، جس کے بارے میں بتایا گیا ہے کہ وہ دارالحکومت کے پوش ایریا میں واقع اسلامک سینٹر کا ڈائریکٹر ہے۔
ایف آئی اے کے مطابق ملزم زاہد اقبال شکایت کنندہ خاتون کی فحش تصاویر اور ویڈیوز نشر کرنے اور بلیک میل کرنے میں ملوث تھا، ملزم نے متاثرہ خاتون کی نازیبا تصاویر اور ویڈیوز واٹس ایپ کے ذریعے شیئر کیں۔
ملزم زاہد اقبال نے خاتون کو شادی کا جھانسہ دے کر قابل اعتراض مواد حاصل کیا اور نازیبا تصاویر اور ویڈیوز کی آڑ میں انہیں دھمکیاں دیں، ملزم کے موبائل کے فورینزک تجزیے کے دوران متاثرہ خاتون کی متعدد نازیبا ویڈیوز برآمد کرلی گئی ہیں۔
ابتدائی تفتیش کے مطابق ملزم گزشتہ 9 ماہ سے شکایت کنندہ کو ہراساں کر رہا تھا۔ ملزم کے خلاف پیکا ایکٹ کے تحت مقدمہ درج اور اسے ضمانت قبل از گرفتاری خارج ہونے پر گرفتار کیا گیا ہے۔
تفتیش کاروں کے مطابق بلیک میلنگ کے لیے ملزم زاہد اقبال نے اپنے مذموم مقاصد کے لیے رشتہ داروں اور دیگر افراد کے نام پر جاری موبائل سمز کا استعمال کیا تھا۔ ایف آئی اے کی ٹیم معاملے کی مزید تفتیش کر رہی ہے۔
