تحریک انصاف (پی ٹی آئی ) کی جیل بھرو تحریک کیلئے خیبرپختونخوا میں کارکنان کی رجسٹریشن شروع کر دی گئی۔
نجی ٹی وی ڈان نیوز کے مطابق خیبر پی کے میں یونین کونسل کی سطح پر 50 کارکنان کا اںتخاب ہو گا۔ چیئرمین تحریک انصاف عمران خان نے چند روز قبل کارکنان سے خطاب میں کہا تھا کہ وہ جیل بھرو تحریک کی تیاری کر لیں۔
ان کا کہنا تھا کہ موجودہ سیاسی صورتحال میں ان کی جماعت کے پاس دو راستے ہیں یا تو وہ پورے ملک میں ہڑتالیں اور پہیہ جام کریں جو کہ جمہوریت کا راستہ ہے۔ لیکن معیشت کا اتنا برا حال ہے کہ اگر ہم اس راستے پر گئے تو معیشت مزید متاثر ہو جائے گی۔
عمران خان کی جیل بھرو تحریک کی ہدایت پر وزیر داخلہ رانا ثنا اللہ نے رد عمل میں کہا تھا کہ عمران خان جیل بھرو تحریک شروع کریں، انہیں ان ہی سیلوں میں رکھیں گے جہاں انہوں نے اپوزیشن رہنماؤں کو رکھا تھا۔
