ایران کے شورش زدہ جنوب مشرقی علاقے میں ایک پولیس اسٹیشن پر مسلح افراد اور خود کش بمبار کے حملے میں 2 پولیس افسران اور 4 حملہ آور مارے گئے ہیں۔
ایران کے سرکاری ٹیلی ویژن نے خبر دی ہے کہ یہ حملہ صوبہ سیستان۔بلوچستان کے صدر مقام زاہدان میں ہوا، یہ علاقہ گزشتہ سال پولیس کی زیر حراست ایک نوجوان کرد خاتون کی ہلاکت کے بعد سے بدامنی کا شکار ہے۔ یہاں اس ہلاکت کے خلاف گزشتہ سال سے خونریز مظاہرے شروع ہیں۔
سرکاری ٹیلی ویژن نے کہا کہ ہفتہ کے روز پولیس چیک پوسٹ پر مسلح افراد اور خود کش بمبار کے حملے کے دوران ‘چاروں دہشت گرد’ اور 2 پولیس اہلکار مارے گئے ہیں۔
واضح رہے کہ ایران کا صوبہ سیستان۔بلوچستان پاکستان کے صوبہ بلوچستان اور افغانستان سے متصل ہے، سیستان۔بلوچستان ایران کے پسماندہ ترین صوبوں میں سے ایک ہے اور اسے منشیات کی اسمگلنگ کا ایک بڑا راستہ بھی قرار دیا جاتا ہے۔
انسانی حقوق کی تنظیموں کا کہنا ہے کہ سیستان میں بلوچ اقلیت جن کی تعداد 20 لاکھ تک ہے، کو کئی دہائیوں سے امتیازی سلوک اور جبر کا سامنا ہے۔
صوبہ سیستان۔بلوچستان کا علاقہ زاہدان میں 30 ستمبر 2022 کو مظاہرین کی ہلاکت کے بعد سے ہفتہ وار مظاہرے ہو رہے ہیں، جب کہ ملک کے بیشتر حصوں میں بدامنی کم ہو چکی ہے۔
ادھر ایمنسٹی انٹرنیشنل نے کہا ہے کہ سیکیورٹی فورسز نے مظاہرین کے خلاف کریک ڈاؤن میں کم از کم 66 افراد کو ہلاک کیا ہے۔ حکام نے اس رپورٹ کے بعد زاہدان کے پولیس کمانڈر اور ایک تھانے کے سربراہ کو برطرف کر دیا۔
