ترکیہ اور شام میں آنے والے خوفناک زلزلے نے دونوں ممالک میں تباہی و بربادی کی کئی داستانیں رقم کی ہیں ، چند ہی دن میں بہت سے دل دہلا دینے والے مناظر عکس بند کئے جا چکے ہیں ۔
غیر ملکی خبر رساں ادارے اے ایف پی کے مطابق ترکی میں زلزلے کے مرکز کے قریب واقع شہر میں خاصی تباہی ہوئی ہے۔ وہیں عکس بند کیے گئے ایک دلخراش منظر نے سوشل میڈیا صارفین کو جھنجھوڑ کر رکھ دیا ہے۔
تصویر میں دیکھا جا سکتا ہے کہ گھر کے ملبے پر بیٹھا مجبور و لاچار باپ ملبے تلے دبی مردہ بیٹی کا ہاتھ تھامے بے بسی کی تصویر بنا بیٹھا ہے ۔
لڑکی کے والد میسوت ہینسر کا کہنا ہے اس کی پندرہ برس کی بیٹی امراک علیٰ الصباح اپنے بیڈ پر سو رہی تھی کہ ہولناک زلزلے نے اسے جان بچانے کا موقع ہی نہ دیا ۔
تصویر میں واضح ہے کہ بیڈ کا زیادہ تر حصہ ملبے میں دبا ہوا ہے جو نکالے جانے کے قابل نہیں اور نہ ہی باپ کی شفقت بیٹی کا ہاتھ چھوڑنے پر راضی ہے۔
