وزیراعظم پاکستان شہباز شریف نے کہا ہے کہ کرپشن، لوٹ مار اور قوم کے خلاف جرائم میں عدالتوں کا سامنا کرنے کی جرات نہ رکھنے والے نے طویل منصوبہ بندی اور مسلسل ذہن سازی سے 9 مئی کا یوم سیاہ کرایا، یہ پاکستان میں خانہ جنگی اور اداروں کو عوام سے ٹکرانے کی مذموم سازش تھی جو اللہ تعالیٰ کے فضل اور عوامی شعور کی وجہ سے ناکام ہوگئی۔
سماجی رابطے کی ویب سائٹ ٹوئٹر پر انہوں نے لکھا کہ 9 مئی کا فائدہ صرف پاکستان دشمنوں کو ہوا۔ لاتعداد ویڈیوز، بیانات اور ناقابل تردید شواہد کی موجودگی پروپیگنڈے اور جھوٹ پر مبنی ہر ٹوئٹ پر کہیں بھاری ہے، پیٹرول بم، شہدا کی یادگاریں، جلی ہوئی عمارتیں، مساجد، اسکولز، ایمبولینسز، ریڈیو پاکستان کی خاکستر عمارت ہر جھوٹے کو جھوٹا ثابت کرنے کے لیے کافی ہیں۔ چیئرمین پی ٹی آئی کی گرفتاری کو اسلام آباد ہائیکورٹ کے فیصلےمیں درست قرار دیا گیا۔
اللہ کا شکر ہے جس نے قائد محمد نوازشریف سمیت ہمیں بطور جماعت سیاسی انتقام میں اندھے سیاسی مخالف ٹولے کے ہر جھوٹ، بے بنیاد مقدمات اور عوام کی خدمت کے ہر امتحان میں سرخرو فرمایا۔
پاکستان ہی نہیں نیشنل کرائم ایجنسی اور برطانیہ کی عدالتوں کے فیصلوں میں جھوٹ کے سوداگروں کے ہر سوال… https://t.co/A4InKeJxCA
— Shehbaz Sharif (@CMShehbaz) July 10, 2023
وزیراعظم نے عمران خان کا نام لیے بغیر لکھا کہ جھوٹے مقدمات کے باوجود ہم عدالت میں پیش ہوتے رہے، آپ بھی جرات کریں۔ اگر ہاتھ صاف ہوتے تو منی لانڈرنگ کے حقائق پر مبنی فنانشل ٹائمز کی تحقیقاتی خبرکو برطانیہ کی عدالت میں چیلنج کرتے جیسے میں نے ڈیلی میل کے جھوٹ کو بے نقاب کیا تھا لیکن اس کے لیے سچائی، ثبوت اور دلیری درکار ہے۔
انہوں نے لکھا کہ اللہ کا شکر ہے جس نے قائد محمد نوازشریف سمیت ہمیں بطور جماعت سیاسی انتقام میں اندھے سیاسی مخالف ٹولے کے ہر جھوٹ، بے بنیاد مقدمات اور عوام کی خدمت کے ہر امتحان میں سرخرو فرمایا۔
شہباز شریف نے کہا کہ پاکستان ہی نہیں نیشنل کرائم ایجنسی اور برطانیہ کی عدالتوں کے فیصلوں میں جھوٹ کے سوداگروں کے ہر سوال کا شافی اور کافی جواب موجود ہے، تازہ ترین مثال احتساب عدالت لاہور کا پلاٹ الاٹمنٹ ریفرنس کا فیصلہ ہے جس میں واضح لکھا ہے کہ نوازشریف ’سیاسی انتقام کا نشانہ بنے، کیس تھا نہیں، بنایا گیا”۔ اس جھوٹ کو ریفرنس کا نام دینے والے گنہگاروں کو اللہ اور عوام سے معافی مانگنی چاہیے لیکن یہ بھی وہ کر سکتا ہے جس کے دل میں خوف خدا ہو۔
شہباز شریف نے لکھا کہ مریم نواز شریف سمیت ہماری بہو بیٹیوں کو ناحق جیلوں میں قید کیاگیا، چادر اور چار دیواری کی حرمت پامال ہوئی، 15 کلو ہیروئن کے جعلی مقدمے بنائے گئے، اللہ کی قسمیں کھا کر سیاہ جھوٹ بولے گئے، طیبہ گل کے اغوا کاروں کی ٹوئٹ بھی ان کے جھوٹے مقدمات اور قسموں کی طرح ہے۔
