پاک بھارت کرکٹ تنازع، ذکاء اشرف اور جے شاہ کی اہم ملاقات آج ہوگی

پاکستان کرکٹ بورڈ (پی سی بی) کے سربراہ ذکاء اشرف اور بھارتی کرکٹ بورڈ (بی سی سی آئی) کے سیکرٹری جے شاہ آج جنوبی افریقہ کے شہر ڈربن میں اہم ملاقات کریں گے، جس میں دونوں عہدیداران ورلڈ کپ اور ایشیا کپ سے متعلق ایک دوسرے کے اعتراضات پر بات چیت کریں گے۔

ذرائع کے مطابق پی سی بی اور بی سی سی آئی کے عہدیداران آئی سی سی کے سالانہ اجلاس کی سائیڈ لائنز پر ملاقات کریں گے اور پاکستان کی بھارت میں ہونے والے ورلڈ کپ میں شرکت کے حوالے سے تحفظات پر تبادلہ خیال کیا جائے گا۔

پی سی بی ذرائع کے مطابق ورلڈ کپ کے علاوہ دونوں ممالک کے مابین دو طرفہ سیریز کے حوالے سے بھی تبادلہ خیال کیا جائے گا۔

مزید پڑھیں

• بھارت ایشیا کپ کے لیے نہ آیا تو پاکستان ورلڈ کپ سے دستبردار ہو جائے گا، احسان مزاری

  

• کرکٹ ورلڈ کپ: قومی ٹیم بھارت جائے گی یا نہیں؟ وزیراعظم نے اہم فیصلہ کرلیا

  

واضح رہے ایشیا کپ اور ورلڈ کپ کے معاملے پر دونوں ممالک تنازعات کا شکار ہیں، جبکہ وفاقی وزیر برائے بین الصوبائی رابطہ احسان مزاری یہ بیان بھی دے چکے ہیں کہ اگر بھارت ایشیا کپ کے لیے سرحد پار سفر کرنے سے گریز کرتا ہے تو قومی ٹیم بھارت میں ہونے والے 2023 ورلڈ کپ سے دستبردار ہو جائے گی۔

یاد رہے کہ ورلڈکپ میں شرکت کے حوالے سے وزیراعظم شہباز شریف نے ایک اعلیٰ سطح کی کمیٹی قائم کی ہے، اس کمیٹی کی سربراہی وزیر خارجہ بلاول بھٹو زرداری کر رہے ہیں جبکہ دیگر ارکان میں وفاقی وزراء رانا ثناء اللہ، اعظم تارڑ، احسان مزاری، مریم اورنگزیب، اسعد محمود، امین الحق، قمر زمان کائرہ اور طارق فاطمی شامل ہیں۔