پاکستان کی ممتاز مخیّر شخصیت ڈاکٹر امجد ثاقب کو غربت کے خاتمے اور سماجی ترقی میں بے مثال اور بے لوث خدمات کے اعتراف میں ’عشرے کا عالمی آدمی‘ (گلوبل مین آف دی ڈیکیڈ) کے ایوارڈ سے نوازا گیا ہے۔
ڈاکٹر امجد ثاقب نے لندن میں منعقدہ ’گلوبل ویمن ایوارڈز 2023‘ کی تقریب میں ایوارڈ وصول کرنے کے بعد کہا کہ ’میں اس عالمی اعزاز کو حاصل کرنے پر بہت فخر اور عاجزی محسوس کرتا ہوں۔ یہ ایک بار پھر خوشی کی بات ہے کہ مجھے یہ ایوارڈ بہت سے رہنماؤں، مردوں اور خواتین کی موجودگی میں مل رہا ہے جو اس دنیا کو تبدیل کر رہے ہیں‘۔
ڈاکٹر امجد ثاقب نے اپنا ایوارڈ پاکستان کے عوام اور رضاکاروں کے نام وقف کیا جو ’بہتر دنیا کی تعمیر کے لیے جدوجہد کررہے ہیں۔ ایک ایسی دنیا جو غُربت اور استحصال سے پاک ہو‘۔
واضح رہے کہ ڈویلپمنٹ پریکٹیشنر ڈاکٹر امجد ثاقب نے 2001 میں اخوت فاؤنڈیشن کی بنیاد رکھی تھی جو ایک مائیکرو فنانس ادارہ ہے اور غریبوں کو بلاسود قرضے فراہم کرتا ہے۔ اخوت کا کہنا ہے کہ یہ دنیا کا سب سے بڑا بلاسود مائیکرو فنانس پروگرام ہے۔
تقریب میں پاکستانی کاروباری شخصیت اور سماجی کارکن ہُما فخر کو بھی تقریب میں ایوارڈ سے نوازا گیا ہے۔انہیں ’گلوبل ویمن انسپائریشن ایوارڈ‘ دیا گیا ہے۔ ہمافخر، سلطانہ رائس اینڈ میپ کیپٹل تنظیموں کی بانی اور چیف ایگزیکٹو آفیسر (سی ای او) ہیں۔ کاروبار میں متاثر کن کارکردگی کے اعتراف میں انہیں ایوارڈ دیا گیا ہے۔
ہُما فخر پاکستان میں یتیم خانوں میں اسکول کی سطح پر خاص طور پر لڑکیوں میں انٹرپرینیورشپ کی حوصلہ افزائی کر رہی ہیں تاکہ وہ با اختیار ہو سکیں اور اپنے لیے روزی کما سکیں۔
