وفاقی وزیر قانون اعظم نذیر تارڑ نے کہا ہے کہ انتخابی اصلاحات کمیٹی کا مسودہ تقریباً حتمی ہو گیا ہے اسے اب تحریری شکل میں لانا ہے، انتخابی اصلاحات وقت سے پہلے منظر عام پر نہ آئیں اس لیے بند کمرے میں میٹنگ رکھی گئی۔
اعظم نذیر تارڑ نے کہا کہ انتخابی اصلاحات کا مجوزہ مسودہ منگل 18 جولائی کو پارلیمانی کمیٹی کے سامنے پیش کیا جائے گا، امید ہے تحریر شدہ مسودے سے متعلق اعلامیہ بھی جاری کیا جائے گا، اِکا دُکا تجاویز کے حوالے سے دیکھا جائے گا کہ وہ آئین سے متصادم تو نہیں ہیں۔
’پارلیمانی کمیٹی برائے انتخابی اصلاحات کے اجلاس میں سینیٹ میں ٹیکنوکریٹ کی نشست کی لیے قانون تبدیل کرنے پر اتفاق ہو گیا‘۔
ذرائع کے مطابق سینیٹ میں ٹیکنوکریٹ کی سیٹ پر تعلیمی قابلیت کے علاوہ 20 سالہ تجربہ درکار ہو گا، پولنگ ڈے سے 5 روز قبل پولنگ اسٹیشن تبدیل نہیں کیا جا سکے گا، انتخابی اخراجات کے لیے امیدوار پہلے سے زیر استعمال بینک اکاؤنٹ استعمال کر سکیں گے، امیدواروں کے کاغذات نامزدگی اور قواعد و ضوابط سے متعلق ایجنڈا کل تک موخر کر دیا گیا۔
