ایف آئی اے نے کراچی میں مبینہ طور پر انسانی اسمگلنگ میں ملوث ایک ٹریول ایجینسی چلانے والے ایک گروہ کو پکڑ لیا اور ان کے قبضے سے غیرقانونی طور پر استعمال ہونے والی مختلف اشیا برآمد کرلیں۔
ترجمان ایف آئی اے کے مطابق انسداد انسانی اسمگلنگ سرکل نے کراچی کے گلشن اقبال کے علاقے میں مذکورہ جعلی ٹریول ایجنسی پر چھاپہ مارتے ہوئے 2 ملزمان کو گرفتار کرلیا اور ان کے پاس موجود پاسپورٹ اپنے اپنی تحویل میں لے لیے۔
گرفتار کیے گئے افراد کے نام محمد راحیل اور کاشف رضا ہیں جب کہ ان کے قبضے سے 250 پاسپورٹ برآمد ہوئے جنہیں ضبط کرلیا گیا۔
چھاپے کے دوران مختلف جعلی مہریں بھی برآمد کی گئیں۔ مقدمہ درج کرتے ہوئے ملزمان کا متعلقہ عدالت سے 4 دن کا ریمانڈ حاصل کرلیا گیا۔
ترجمان کا کہنا ہے کہ ملزمان سے تفتیش جاری ہے اور ان سے مزید انکشافات اور گرفتاریوں کا بھی امکان ہے۔