پُرخطر جوہری مواد کی دیکھ بھال کے حوالے پاکستان ہمسایہ ممالک بھارت، ایران اور جنوبی کوریا سے کئی درجے بہتر پوزیشن پر ہے، اور پاکستان نے گذشتہ جائزے سے ابتک 3 مزید پوائنٹس حاصل کیے ہیں اور یہ 22 ریاستوں کی فہرست میں 19ویں نمبر پر ہے۔
’عرب نیوز‘ کے مطابق عالمی جوہری سلامتی کا جائزہ لینے والے بین الاقوامی ادارے نیوکلیئر تھریٹ انیشی ایٹو (این ٹی آئی) نے پُرخطر مواد کی دیکھ بھال کے حوالے رپورٹ جاری کر دی ہے۔ جس میں کہا گیا ہے کہ پُرخطر جوہری مواد کی دیکھ بھال کے حوالے پاکستان ہمسایہ ملک بھارت سے آگے اور بہتر پوزیشن پر ہے۔
نیوکلیئر تھریٹ انیشی ایٹو (این ٹی آئی) ممالک کی جوہری سلامتی کے امکانات اور کاوشوں کو ایک معیار اور اعشاریوں کے سیٹ پر مبنی پیمانے پر جانچتا ہے۔ جانچ پڑتال کے اس پیمانے میں جوہری مواد اور سہولیات کے تحفظ، بین الاقوامی طریقوں اور معاہدات کی پاسداری، جوہری سلامتی کے ریگولیٹری فریم ورک، جوہری ہتھیاروں اور مواد تک غیر مجاز رسائی کو روکنے کے لیے بہترین طریقوں پر عمل درآمد جیسے عوامل شامل ہیں۔
Falling Short in a Dangerous World: The 2023 NTI Nuclear Security Index reveals concerning regression in nuclear security conditions worldwide. https://t.co/uuziXAQZFU
— NTI (@NTI_WMD) July 18, 2023
امریکا (واشنگٹن) میں قائم غیر منافع بخش ادارہ، نیوکلیئر تھریٹ انیشی ایٹو اس بات کا انتہائی محتاط ریکارڈ رکھتا ہے کہ ممالک جوہری مواد کو کیسے ہینڈل کرتے ہیں۔ این ٹی آئی انڈیکس نے پاکستان کا مجموعی سکور، 49، ایک گوشوارے کی شکل میں ظاہر کیا جو بھارت کے 40، ایران کے 29، اور جنوبی کوریا کے 18 سے بہتر ہے۔
انڈیکس سے ظاہر ہوتا ہے کہ جوہری سہولیات کی حفاظت کے اعتبار سے پاکستان، روس اور اسرائیل کے ساتھ 32 ویں درجے پر ہے اور47 ممالک کی فہرست میں بھارت، ایران، میکسیکو، جنوبی افریقہ اور دیگر کئی ممالک سے اوپر ہے۔
رپورٹ کے مطابق فرانس، بھارت، ایران، جنوبی کوریا، پاکستان، روس اور برطانیہ نے ایسے جوہری مواد کے ذخائر میں اضافہ کیا ہے جو ہتھیاروں کی صورت میں استعمال کیے جا سکتے ہیں۔ اس اضافے کی وجہ سے جوہری ہتھیاروں میں کمی لانے اور خاتمے کی کوششیں سبوتاژ ہوتی ہیں۔
