گزشتہ روز شادی کے بندھن سے جڑنے کے بعد پاکستانی کرکٹ آل راؤنڈر شاداب خان کہتے ہیں کہ زندگی کے اس نئے سفر پر بلکل نئے میچ کی طرح پرجوش ہوں۔ سب کچھ اتنی جلدی ہوا کہ مجھے خود بھی نہیں پتا چلا ۔ پی ایس ایل سے پہلے شادی ہونے پر بے حد خوش ہوں۔
شادی کے بعد پی سی بی ڈیجیٹل پر گفتگو کے دوران اسلام آباد یونائیٹد کے کپتان شاداب خان کا کہنا تھا کہ ساتھی کرکٹرز کی شادیاں اتفاق نہیں۔ ’میری اور حارث کی شادیاں تو اچانک ہو گئیں جبکہ شاہین شاہ اور شان مسعود کی شادیاں پہلے سے طے شدہ تھیں۔
24 سالہ پنڈی بوائے کے مطابق وہ آسٹریلیا جانے کے لیے پر تول رپے تھے کہ اچانک فلائیٹ کینسل ہوئی اور پورا فلمی سین ہوگیا۔ ’دس دن میں منگنی اور شادی ہو گئی۔ مجھے خود نہیں پتا چلا۔ حارث اور مجھے انجری کی وجہ سے وقت ملا تو سوچا شادی کرلیں۔‘
مایہ ناز پاکستانی آف اسپنر ثقلین مشتاق کے داماد بننے پر پوچھے گئے سوال پر شاداب خان کا کہنا تھا کہ شادی کے بعد بھی وہ ثقلین بھائی ہی رہیں گے ابا نہیں۔ ’ثقلین مشتاق کے ساتھ ابھی کوچ والے ہی معاملات ہیں سسر والے نہیں۔ کوچ سے تو ڈانٹ پڑتی ہی رہتی ہے لیکن ثقلین بھائی کے ساتھ اچھے تعلقات ہیں۔‘
شاداب خان کے مطابق انہیں ہزاروں دل توڑنے کا دکھ ہے بھی اور نہیں بھی کیونکہ جو دل کل ٹوٹنے تھے وہ آج ہی ٹوٹ گئے۔ سب کچھ آںاً فاناً ہوا مگر پی ایس ایل سے پہلے شادی ہونے پر بے حد خوشی ہے۔
