انٹرنیشنل کرکٹ کونسل (آئی سی سی) نے بھارتی ویمن کرکٹ ٹیم کی کپتان ہرمن پریت کور پر 2 انٹرنیشنل میچز کی پابندی اور میچ کی 75 فیصد فیس ادا کرنے کا جرمانہ عائد کردیا، ہرمن پریت نے بنگلادیش کے خلاف تیسرے ون ڈے میچ میں آئی سی سی کے کوڈ آف کنڈکٹ کی خلاف ورزی کی تھی۔
سوشل میڈیا پر تنقید کا نشانہ بننے والی بھارتی ویمن ٹیم کی کپتان ہرمن پریت کور کو انکا جارحانہ انداز لے ڈوبا اور پابندی کا باعث بنا، میچ کے دوران آؤٹ ہونے پربے جا غصے کا اظہار کرنا اور ایمپائرز پر طنز کرنا ہرمن پریت کے گلے پڑ گیا۔
آئی سی سی کا کہنا ہے کہ کوڈ آف کنڈکٹ کی خلاف ورزی کرنے پر بھارتی ویمن کرکٹ ٹیم کی کپتان ہرمن پریت کور پر 2 میچز کی پابندی عائد کی گئی ہے جبکہ انکو اپنی میچ فیس کا 75 فیصد جرمانے کے طور پر ادا کرنا ہوگا۔
آئی سی سی کے مطابق ہرمن پریت کور نے بنگلہ دیش کے خلاف میچ میں آؤٹ ہو جانے پرغصے کا اظہار کرتے ہوئے وکٹوں پر بلا دے مارا، ایمپائرز کے فیصلے پر اعتراض اٹھاتے ہوئے انکو تنقید کا نشانہ بنایا اور پوسٹ میچ انٹرویو میں بھی امپائرنگ پر تنقید کرتی رہیں۔
آئی سی سی نے بتایا کہ بھارتی کپتان ہرمن پریت کور نے آئی سی سی کوڈ آف کنڈکٹ کے لیول 2 کی خلاف ورزی کی جس کی پاداش میں ان پر2 میچزکی پابندی عائد کی گئی ہے جبکہ میچ فیس کا 75 فیصد جرمانہ بھی کیا گیا ہے۔
واضح رہے انکی اس حرکت پر شائقین کرکٹ نے بھی غصے کا اظہار کیا اور سوشل میڈیا پر جم کے تنقید کی۔
