اسلامی جمہوریہ ایران کے وزیر خارجہ حسین امیر عبد اللہیان پاکستان کے سرکاری دورہ پر اسلام آباد پہنچ گئے۔
وزارت خارجہ کی جانب سے بدھ کو جاری کردہ بیان کے مطابق وزیر خارجہ بلاول بھٹو زرداری کی دعوت پر اسلامی جمہوریہ ایران کے وزیر خارجہ حسین امیر عبد اللہیان 2 تا 4 اگست پاکستان کے دورے پر ہوں گے۔ ایرانی وزیر خارجہ اوور وزیر خارجہ بلاول بھٹو زرداری ملاقات جمعرات کو ہوگی۔
ملاقات کے دوران وسیع ایجنڈے میں دوطرفہ تعلقات کے تمام پہلو اور موجودہ علاقائی صورتحال پر تبادلہ خیال شامل ہے۔
ایرانی وزیر خارجہ عبداللہیان وزیراعظم محمد شہباز شریف سے بھی ملاقات کریں گے اور دونوں ممالک کی قیادت کے درمیان تعلقات کو آگے بڑھانے کے لیے اتفاق رائے پر تبادلہ خیال کریں گے۔
ایرانی وزیر خارجہ اسپیکر قومی اسمبلی اور چیئرمین سینیٹ سے بھی ملاقات کریں گے جس میں دونوں اطراف کے رہنما دونوں برادر ممالک کے درمیان پارلیمانی رابطوں پر تبادلہ خیال کریں گے۔
قبل ازیں نائب وزیر خارجہ برائے اقتصادی امور اور تجارت، سڑکوں اور شہری ترقی، سرمایہ کاری، زراعت، توانائی وغیرہ کی وزارتوں کے سینیئر حکام پر مشتمل اعلیٰ سطحی وفد نے وزیر خارجہ کے دورہ سے متعلق تیاریوں کے لیے ملاقاتیں کیں۔
📸 Foreign Minister of Iran @Amirabdolahian has arrived in #Islamabad for a two day official visit to Pakistan at the invitation of Foreign Minister @BBhuttoZardari.
🇵🇰🤝🇮🇷 pic.twitter.com/t1hkyUnCqK
— Ministry of Foreign Affairs – Pakistan (@ForeignOfficePk) August 2, 2023
ایرانی وزیر خارجہ عبد اللہیان کا یہ دورہ فریقین کے لیے دوطرفہ تعلقات کے تمام شعبوں پر تبادلہ خیال کرنے کا موقع ہوگا جس میں علاقائی رابطوں، توانائی اور پاکستان اور ایران کے درمیان اقتصادی اور سرمایہ کاری کے تعلقات پر خصوصی توجہ مرکوز کی جائے گی۔
