سابق وزیراعظم پاکستان و چیئرمین پی ٹی آئی عمران خان نے کہا ہے کہ قوم میری گرفتاری پر چپ کر گھروں میں نہ بیٹھی رہے۔ میں یہ جنگ اپنے لیے نہیں بلکہ قوم کے لیے لڑ رہا ہوں۔
چئیرمین عمران خان کا اپنی گرفتاری کی صورت میں قوم کے لیے ریکارڈ کروایا گیا اہم پیغام#لندن_پلان_نامنظور pic.twitter.com/dun1KUzX38
— PTI (@PTIofficial) August 5, 2023
توشہ خانہ کیس کے فیصلے کے بعد گرفتاری سے قبل ریکارڈ کروائے گئے ایک پیغام میں عمران خان نے کہا کہ میں قوم کے بچوں کے مستقبل کی جنگ لڑ رہا ہوں، اگر قوم جدوجہد نہیں کرے گی تو غلامی کی زندگی گزارے گی۔ اور غلاموں کی کوئی عزت نہیں ہوتی، چیونٹیوں کی طرح زندگی گزارنا پڑتی ہے۔
عمران خان نے کہا کہ کلمہ طیبہ ہمیں غلامی سے آزاد کرتا ہے، مدینہ کی ریاست میں ہمارے نبی کریم ؐ نے عدل و انصاف کی بنیاد پر لوگوں کو آزاد کیا تھا۔
یہ بھی پڑھیں عمران خان زمان پارک لاہور سے گرفتار، اسلام آباد منتقل کرنے کی تیاریاں
انہوں نے کہا کہ آزادی کبھی بھی پلیٹ میں رکھ کر نہیں دی جاتی، قوم اس وقت تک پر امن احتجاج جاری رکھے جب تک اسے آزادی نہیں مل جاتی۔
چیئرمین پی ٹی آئی نے قوم سے اپیل کرتے ہوئے کہا کہ آپ نے اس وقت تک جدوجہد جاری رکھنی ہے جب تک اپنے ووٹ کے ذریعے حکومت منتخب کرنے کا اختیار نہیں مل جاتا، کہیں ایسا نہ ہو کہ آج کہ طرح پھر قبضہ گروپ کو اقتدار میں بٹھا دیا جائے۔
واضح رہے کہ اسلام آباد کی سیشن عدالت نے چیئرمین پاکستان تحریک انصاف عمران خان کو توشہ خانہ کیس میں 3 سال قید اور ایک لاکھ روپے جرمانے کی سزا سنائی ہے جس کے بعد سابق وزیراعظم کو زمان پارک لاہور سے گرفتار کر لیا گیا ہے۔
