پاکستان تحریک انصاف (پی ٹی آئی) کی کور کمیٹی نے چیئرمین تحریک انصاف عمران خان کی گرفتاری کے خلاف ملک گیر پُر امن احتجاج کی کال دے دی ہے۔
وائس چیئرمین پی ٹی آئی شاہ محمود کی زیر صدارت اجلاس میں کور کمیٹی کے ارکان نے شرکت کی۔ اجلاس میں پی ٹی آئی چیئرمین عمران کے خلاف فیصلے کو متعصبانہ قرار دیا گیا۔
پاکستان تحریک انصاف کی کورکمیٹی کے ہنگامی اجلاس کا اعلامیہ#لندن_پلان_نامنظور pic.twitter.com/DlyrZiWEUP
— PTI (@PTIofficial) August 5, 2023
اجلاس میں چیئرمین تحریک انصاف کی رہائی کے لیے قانونی چارہ جوئی سمیت آئندہ کی حکمتِ عملی پر تفصیلی مشاورت کی گئی۔
تحریک انصاف کی کور کمیٹی نے عدالتِ عظمیٰ سے تحریک انصاف کی نظرِثانی درخواست کی بلاتاخیر سماعت کی بھی اپیل کی ہے۔
اس کے علاوہ چیئرمین پاکستان تحریک انصاف کی ہدایات کی روشنی میں تنظیمی و سیاسی حکمتِ عملی پر عملدرآمد کا بھی آغاز کر دیا گیا۔
کورکمیٹی اجلاس کے اعلامیے میں کہا گیا ہے کہ ٹھوس شواہد کے باوجود ایک متعصّب جج کے نہایت ناقص فیصلے کو پوری قوم نے مسترد کیا ہے، پہلے سے طے شدہ منصوبے کے تحت ایک جعلی ٹرائل کے ذریعے فیصلہ سنایا گیا اور چیئرمین تحریک انصاف کو گرفتار کیا گیا۔
یہ بھی کہا گیا ہے کہ چیئرمین تحریک انصاف عمران خان کی طے شدہ منصوبے کے تحت گرفتاری پر پوری قوم میں شدید ردِعمل کی کیفیت ہے، سپریم کورٹ چیئرمین عمران خان کے خلاف فیصلے کی اپیل پر بلاتاخیر سماعت کرے۔
مزید پڑھیں
پی ٹی آئی کور کمیٹی نے کہا ہے کہ تحریک انصاف کی اپیل کو چھٹیوں اور دیگر معمولات کا لحاظ کیے بغیر ترجیحی بنیادوں پر سماعت اور فیصلے کے لیے مقرر کیا جائے۔
اجلاس میں کہا گیا کہ دستور پُرامن احتجاج کا حق دیتا ہے، تحریک انصاف کے کارکن اس نا انصافی کے خلاف ملک گیر احتجاج کریں گے۔
پی ٹی آئی کی کور کمیٹی نے کہا ہے کہ تحریک انصاف اپنے چیئرمین کی تلقین و ہدایات کی روشنی میں مکمل طور پر پرامن اور آئین و قانون کے دائرے میں رہ کر احتجاج کرے گی، تحریک انصاف کے کارکنان عوام کے ساتھ مل کر مکمل نظم و ضبط اور آئین و قانون کے دائرے میں رہ کر احتجاج کریں۔
کور کمیٹی نے کہا کہ اپنے قائد کو ظلم کے شکنجے اور ظالم کی قید سے رہائی دلوانے کے لیے بھرپور قانونی لڑائی لڑیں گے۔ قوم کے معتبر اور محبوب ترین قائد کو رہا کروائیں گے جو پہلے کی طرح پورے عزم و استقلال سے حقیقی آزادی کی تحریک کی قیادت کریں گے۔
پی ٹی آئی کور کمیٹی نے کہا کہ پوری قوم ملک میں جاری ظلم و فسطائیت کے خلاف عمران خان کی ہم آواز، آئین و جمہور دشمن سازشیوں کے خلاف کھڑی ہے۔
پی ٹی آئی کور کمیٹی کے مطابق تحریک انصاف کے ذمہ داران چیئرمین کی ہدایات کی روشنی میں سفّاک امپورٹڈ سرکار کے ہاتھوں گرفتار ہوئے بغیر سیاسی و تنظیمی حکمتِ عملی آگے بڑھائیں گے۔
