وزیر اعظم شہباز شریف نے کہاکہ پاکستان اور چین سی پیک کے دوسرے مرحلے میں داخل ہو رہے ہیں، مشکل وقت گزر چکا ہے اب ترقی کے سفر کا آغاز ہو رہا ہے، کیونکہ چینی کمپنیوں اور حکومت نے پاکستان میں بے پناہ سرمایہ کاری کی ہے۔
اسلام آباد میں چینی بینکوں اور کمپنیوں کو ایوارڈز دینے کی تقریب سے وزیراعظم شہباز شریف نے خطاب کرتے ہوئے کہاکہ چین کی سرمایہ کاری سے پاکستان کا معاشی منظرنامہ تبدیل ہوا ہے، چینی کمپنیوں کے پاکستان میں کام کرنے سے ملک میں روزگار کے نئے مواقع پیدا ہوئے ہیں۔
مزید پڑھیں
وزیر اعظم نے کہاکہ چائنا پاکستان اکنامک کوریڈدور (سی پیک) چینی صدر شی جنگ پنگ کے روڈ اینڈ بیلٹ منصوبے کا اہم جزو ہے، اس منصوبے کے تحت چائنا ابھی تک 30 ارب ڈالرز سے زائد کی سرمایہ کاری کر چکا ہے۔
انہوں نے کہاکہ آرمی چیف جنرل سید عاصم منیر نے سی پیک کو آگے بڑھانے میں بہت اہم کردارادا کیا ہے، جنرل عاصم منیر کی ہی کاوشوں سے سی پیک دوسرے مرحلے کی جانب گامزن ہو رہا ہے۔
ان کا کہنا تھاکہ چین نے ہر مشکل گھڑی میں آگے بڑھ کر پاکستان کی مدد کی ہے، اور ہمیشہ مشکل وقت سے نکلنے کے لیے معاونت فراہم کی ہے، یہی وجہ ہے کہ پاکستان بھی چین کی دوستی کو قدر کی نگاہ سے دیکھتا ہے اور پاکستان کے لیے کیے گئے تعاون اور انکی کاوشوں کو سراہتا ہے۔
