سابق وزیر اعظم شاہد خاقان عباسی نے کہا ہے وقت آنے پر الیکشن لڑنے کا فیصلہ کروں گا۔ الیکشن مسلم لیگ ن کے ٹکٹ پر لڑوں گا اور اگر ٹکٹ نہ ملا تو الیکشن ہی نہیں لڑوں گا۔
نجی ٹی وی چینل سے گفتگو میں ان کا کہنا تھا مسلم لیگ ن کے ساتھ ہوں۔ پہلے دن سے پارٹی کے ساتھ اور پرانے لوگوں میں سے ہوں۔ بہت سے مراحل آئے لیکن میں جماعت کے ساتھ کھڑا رہا۔
شاہد خاقان عباسی نے مزید کہا میرے لیڈر نوازشریف اور پارٹی صدر شہباز شریف ہیں۔ مریم نواز میری لیڈر نہیں اور نہ ہی مریم نواز کا دعویٰ ہے کہ وہ پارٹی کی لیڈر ہیں۔
انہوں نے کہا اگر مریم نواز پارٹی صدارت کی پوزیشن پر آتی ہیں تو پھر میرا فیصلہ ہو گا کہ میں جماعت کے ساتھ چل سکتا ہوں یا نہیں۔ سیاست کرنی ہے یا نہیں کرنی کیوں کہ میری سیاست مسلم لیگ ن کے اندر ہی ہے ۔
انہوں نے واضح کیا کہ مفتاح اسماعیل کے اسحاق ڈار سے کوئی اختلافات نہیں۔ ملکی معیشت چلانے پر اختلاف رائے ہے اور یہ مثبت عمل ہے۔
