ماضی میں پاکستان کے یوم آزادی کے موقع پر آتش بازی کا مظاہرہ تو کیا ہی جاتا تھا مگر چند برسوں سے باجے کا ایک نیا اضافہ ہوا ہے اور اب ہر سال 14 اگست کو منچلے نوجوان باجے بجا کر جہاں جشن مناتے ہیں وہیں شہریوں کی ناک میں دم کیا ہوتا ہے۔
باجا بجانے والے اپنی تفریح کے چکر میں شور شرابے سے لوگوں کا سکون تباہ و برباد کر دیتے ہیں۔
روں برس 14 اگست کا دن قریب آتے ہی کراچی میں باجا بجانے پر پابندی عائد کر دی گئی ہے۔ جوڈیسل مجسٹریٹ ملیر نے اپنے عدالتی حدود کے علاقوں میں جشن آزادی کے موقع پر باجے کے استعمال اور فروخت کرنے والوں کے خلاف کارروائی کا حکم دے دیا ہے۔
اس سلسلے میں ملیر کورٹ مجسٹریٹ نے ایس ایچ او شرافی گوٹھ اور تھانہ سچل کو ہدایات جاری کی ہیں کہ باجے بجانے والوں کے خلاف کارروائی کرکے عدالت کو آگاہ کیا جائے۔
جوڈیشل مجسٹریٹ انور علی شاہ نے قرار دیا کہ جشن آزادی کے موقع پر باجے بجا کر عوام کو پریشان کیا جاتا ہے۔ تھانہ شرافی گوٹھ اور تھانہ سچل کی حدود میں اس کاروبار کو سختی سے روکا جائے۔