لاہور میں رانگ ڈرائیونگ سے روکنے کی کوشش کرنے والے گارڈ سے ایک ویگو گاڑی میں سوار نامعلوم افراد کی مارپیٹ کے مناظر سوشل ٹائم لائنز پر وائرل ہوئے۔
مختلف ویڈیوز منظرعام پر آنے کے بعد سوشل میڈیا پر اس واقعے میں ملوث افراد کو خوب تنقید کا نشانہ بنایا گیا۔ یہ سلسلہ بڑھا تو لاہور پولیس بھی ایکشن میں آئی اور نامعلوم افراد کے خلاف مقدمہ درج کر لیا گیا۔
پولیس ذرائع کے مطابق وہ اب تک دو ملزمان تک پہچنے میں کامیاب ہوچکی ہے جب کہ مزید 3 افراد کی تلاش جاری ہے۔ ذرائع کا کہنا ہے کہ مختلف جگہوں پر چھاپے مارے جارہے ہیں اور مزید تفتیش میں سامنے آئے گا کہ وہ لوگ کون تھے اور اسلحہ کس کے نام پر تھا۔
واضع رہے کہ پیر کو سامنے آنے والی ویڈیو کے ریکارڈ کیے جانے کی تاریخ تو واضح نہیں تھی البتہ اسے شیئر کرنے والوں کا دعوٰی ہے کہ ویڈیو ڈیفنس ہاؤسنگ اتھارٹی (ڈی ایچ اے) رایا لاہور (ڈیفنس رایا گالف اینڈ کنٹری کلب) کی ہے۔
مختصر دورانیے کی ویڈیو میں دیکھا جا سکتا ہے کہ گاڑیوں کا ایک ہجوم ہے اور ٹریفک کنٹرول کرنے پر مامور ڈی ایچ اے کا ایک گارڈ ان کے لیے راستہ بنا رہا ہے۔
ایسے میں ایک سفید ویگو گاڑی سائیڈ سے آنے والی گاڑی کو راستہ دینے کے بجائے رانگ سائیڈ پر مڑتی ہے جسے روکنے کے لیے گارڈ آگے آتا ہے تاہم ڈرائیور رکنے کے بجائے گاڑی سے گارڈ کو دھکیلتا ہوا آگے بڑھ جاتا ہے۔
اگلے مناظر میں گاڑی کو رکتے اور اس میں سے کچھ افراد کو اترتے دیکھا گیا۔ ہاتھوں میں اسلحہ تھامے یہ افراد گارڈ کے پاس پہنچ کر اس کی پٹائی کرتے ہیں۔
Situation at Fairways Commercial, DHA Raya. Rule of law must prevail. @OfficialDPRPP pic.twitter.com/NYvWqpKrJI
— Islamabad Updates (@IslamabadViews) August 7, 2023
پختہ عمر کے ساتھی گارڈ کو پٹتا دیکھ کر دیگر گارڈز وہاں پہنچتے ہیں لیکن مسلح افراد مار پیٹ کا سلسلہ جاری رکھتے ہیں اور کچھ دیر بعد واپس اپنی گاڑی کی جانب جاتے دکھائی دیتے ہیں۔
