وزیر اعظم میاں محمد شہباز شریف نے نے بیرون ملک مقیم پاکستانیوں کے لیے ایک مراعاتی پیکج کا اعلان کیا ہے جس کا مقصد ملک کے مختلف اداروں کے ساتھ ان کے روابط کو آسان بنانا ہے۔
بدھ کو اپنے ایک ٹوئٹر پیغام میں وزیراعظم نے بیرون ملک مقیم پاکستانیوں کے لیے مراعاتی پیکج کا اعلان کرتے ہوئے اس کے نکات پر روشنی ڈالی۔
مراعاتی پیکیج ایک نظر میں
• تمام صوبوں میں چیف سیکریٹریز اور اسلام آباد میں چیف کمشنر کے تحت اوورسیز پاکستانیوں کی جائیداد کے مسائل کے حل کے لیے ہاٹ لائنز کا قیام۔
• آئی سی ٹی اور پاکستان کے تمام صوبوں میں اوورسیز پاکستانیوں کی جائیداد کے مسائل کو تیز رفتار بنیادوں پر حل کرنے کے لیے مخصوص عدالتوں کا قیام۔
• تمام پبلک سیکٹر ہاؤسنگ اسکیموں میں اوورسیز پاکستانیوں کے لیے 10 فیصد کوٹہ، ادائیگی غیر ملکی کرنسی اور بینکنگ چینل کے ذریعے کی جانے کی صورت میں5 فیصد رعایت۔
• پنجاب اوورسیز پاکستانیز کمیشن کے کامیاب ماڈل دیگر تمام صوبوں میں بھی متعارف ہوگا۔
• بیرون ملک مقیم پاکستانیوں کو پہچاننے اور ان کی سہولت کے لیے ملک کے تمام بین الاقوامی ہوائی اڈوں پر مخصوص امیگریشن کاؤنٹر قائم ہوں گے۔
Today I announced an incentive package for overseas Pakistanis that reflects our government's commitment to providing them with improved services and support. This package aims at enhancing their engagement with Pakistan and to ease their interactions with various institutions.…
— Shehbaz Sharif (@CMShehbaz) August 9, 2023
• اسٹیٹ بینک آف پاکستان کے مرتب کردہ ڈیٹا کے مطابق اوورسیز پاکستانیوں کے لیے ٹاپ 10 ترسیلات زر کو پہچاننے کے لیے ایوارڈز کا اعلان کیا جائے گا۔
• بیرون ملک پاکستانی مشنز میں قابل ذکر اوورسیز پاکستانیوں کے لیے ان کی خدمات و کامیابیوں کے اعتراف اور تعریف کے لیے ہال آف فیم قائم کیا جائے گا۔
• سینٹرل ڈائریکٹوریٹ آف نیشنل سیونگز فار اوورسیز پاکستانیوں کی جانب سے پرکشش شرحوں کے ساتھ قومی بچت کی مخصوص اسکیمیں متعارف کروائی جائیں گی۔
• بیرون ملک سفارت خانوں/مشنز میں نادرا اور پاسپورٹ کی سہولت کے کاؤنٹرز کی تعداد میں اضافہ۔
• بلیک لسٹ شدہ پاسپورٹ مقررہ وقت کے بعد خود بخود ڈی لسٹ ہو جائیں گے۔
• وزارت خارجہ کے ذریعے دستاویزات کی آن لائن تصدیق کو مضبوط بنایا جائے گا اور اسے مزید موثر بنایا جائے گا۔
• وزارت خارجہ کے کیمپ آفس پاکستان کے ان علاقوں میں قائم کیے جائیں گے جہاں بیرون ملک مقیم پاکستانیوں کی زیادہ تعداد موجود ہے تاکہ دستاویزات وغیرہ کی تصدیق میں آسانی ہو۔
• پینشن بینک اکاؤنٹس اور جائیداد کی خرید و فروخت کے لیے اوورسیز پاکستانیوں کی آن لائن بائیو میٹرک تصدیق متعارف کرائی جائے گی۔
• اوورسیز پاکستانیوں کو شادی/طلاق، پیدائش اور موت کے سرٹیفکیٹ جاری کرنے کے لیے نادرا کا نظام یونین کونسلوں سے منسلک ہوگا۔
• بیرون ملک مقیم پاکستانیوں کے بچوں کے لیے پبلک سیکٹر کے اعلیٰ تعلیمی اداروں میں 5 فیصد کوٹہ ہوگا اور غیر ملکی پاکستانیوں کے بچوں کو ضرورت پر مبنی اور میرٹ وظائف بھی دیے جائیں گے۔
