آسٹریلیا میں جاری بگ بیش لیگ (بی بی ایل) میں سڈنی سکسر اور برسبین ہیٹ کے درمیان کھیلے جانے والے میچ میں مائیکل نیسر نے حیران کن کیچ پکڑا۔
اس حیرت انگیز کیچ کو لے کر دنیا بھر میں کرکٹ مداح سوشل میڈیا پر تبصرے کر رہے ہیں کہ کیا واقعی یہ کیچ درست طریقے سے پکڑا گیا یا یہ چھکا تھا۔
اس حوالے سے انٹرنیشنل کرکٹ کونسل (آئی سی سی) نے بھی وضاحت دی ہے۔
اس میچ میں مائیکل نیسر کی ٹیم برسبین ہیٹ نے 15 رنز سے فتح حاصل ہے، حیران کن کیچ تھامنے والے کھلاڑی نے شاندار 4 اوورز میں 41 رنز کے عوض 3 کھلاڑیوں کو آؤٹ بھی کیا۔
سڈنی کے بلے باز جارڈن سلک نے چھکا مارنے کے لیے اونچی ہٹ ماری، مائیکل نیسر نے کیچ پکڑا تو انہیں احساس ہوا کہ وہ باؤنڈری کے باہر چلے جائیں گے تو انہوں نے گیند ہوا میں اچھال دی، تاہم گیند پھر بھی باؤنڈری کے باہر ہوا میں تھی۔
جیسے ہی گیند نیچے آنے لگی تو انہوں نے حاضر دماغی کا مظاہرہ کرتے ہوئے گیند کو دوبارہ اچھال کا باؤنڈری کے اندر پھینکا، انہوں نے احتیاط کی کہ ان کا پاؤں زمین پر نہ لگ جائے، پھر باؤنڈری کے اندر آکر کیچ پکڑ لیا۔
امپائرز نے سوچ بچار کے بعد اسے کیچ قرار دیتے ہوئے بلے باز کو آؤٹ قرار دے دیا تاہم اس حوالے سے کھلاڑی اور شائقین کنفیوژن کا شکار نظر آئے، کچھ لوگ اسے ناٹ آؤٹ جبکہ کچھ کا خیال تھا کہ یہ آؤٹ ہے۔
آسٹریلیا کے آل راؤنڈر گلین میکس ویل نے سماجی رابطے کی ویب سائٹ پر کہا کہ یہ ناٹ آؤٹ ہے، آپ کیچ لینے کے لیے رسی کے اوپر سے چھلانگ نہیں لگا سکتے۔
میلبرن کرکٹ گراؤنڈ نے ٹوئٹ میں بتایا کہ اس بہترین فیلڈنگ کے نتیجے میں کچھ سوالات اٹھے ہیں۔
اس حوالے سے ماہرانہ تبصرے کی ضرورت ہے کہ کیوں یہ آؤٹ تھا۔
دوسری ٹوئٹ میں ایم سی جی نے وضاحت کی کہ دو اہم نقطے ہیں، پہلا یہ کہ پہلی بار گیند کو باؤنڈری کے اندر ہاتھ لگایا گیا ہو۔
دوسرا پوائنٹ یہ ہے کہ باؤنڈری کے باہر فیلڈر ایک ساتھ بال اور زمین کو چھو نہیں کرسکتا۔
اس حوالے سے آئی سی سی نے وضاحت جاری کرتے ہوئے کہا ہے کہ ری پلے دیکھنے کے بعد امپائرز نے فیصلہ کیا کہ یہ درست کیچ تھا لیکن اس حوالے سے کھلاڑیوں، کمنٹیٹرز اور مداحوں میں کنفیوژن ہے۔
آئی سی سی نے قانون 19.5.2 کا حوالے دیتے ہوئے کہا کہ یہ بات ضروری ہے کہ اگر فیلڈر باؤنڈری کے اندر پہلے گیند کو ہاتھ لگاتا ہے تو اسے کیچ کو مکمل کرنے کے اجازت ہے لیکن جب ان کے ہاتھ میں گیند ہو تو باؤنڈری کے باہر پاؤں زمین سے نہ لگیں۔
آئی سی سی نے مزید کہا کہ مائیکل نیسر نے ابتدائی طور پر گیند کو ہاتھ لگایا تھا، چھلانگ لگانے کی ٹائمنگ اور کیچ قوانین کے مطابق تھا لہٰذا بلے باز کو درست آؤٹ قرار دیا گیا۔
