میڈیا رپورٹس کے مطابق 6 فروری کو ترکیہ اور شام میں آنے والے قیامت خیز زلزلے سے اموات کی مجموعی تعداد 37 ہزار سے تجاوز کرگئی ہے۔
اب تک ترکیہ میں 31 ہزار 643 اور شام میں 5 ہزار 714 افراد ہلاک ہوچکے ہیں اور اموات کی مجموعی تعداد 37 ہزار 357 ہوگئی۔
رپورٹس کے مطابق ترکیے کے بعض متاثرہ علاقوں میں پانی کی قلت کے ساتھ ساتھ صحت و صفائی کے مسائل نے بھی سر اٹھانا شروع کر دیا ہے، جب کہ وبائی امراض بھی پھیل رہے ہیں، متاثرین کی جانب سے جلد کی بیماریاں اور ڈائریا کی شکایات سامنے آئی ہیں۔
رپورٹس کے مطابق ہولناک زلزلے سے تباہ عمارتوں کے ملبے سے لوگوں کی تلاش کا عمل جاری ہے۔ گزشتہ روز ترکیہ کے شہر قہرامان ماراش میں 183 گھنٹوں بعد 10 سالہ بچی اور صوبہ حاطے میں 182 گھنٹے بعد 12 سالہ بچے کو ملبے سے زندہ نکالا گیا۔
واضح رہے کہ ترک وزارت انصاف نے ناقص تعمیرات میں ملوث افراد کے وارنٹ گرفتاری جاری کر تے ہوئے 12 افراد کو حراست میں لے لیا ہے۔
اقوام متحدہ نے خدشہ ظاہرکیا ہےکہ ترکیہ اور شام میں زلزلے سے اموات کی تعداد دوگنا ہوسکتی ہے۔
سیکرٹری جنرل اقوام متحدہ نے مطالبہ کیا ہےکہ سلامتی کونسل ترکیہ اور شام کے درمیان سرحد پار امدادی مراکز کھولنے کی اجازت دے۔
