پاکستان تحریک انصاف (پی ٹی آئی ) کی لیگل ٹیم نے پارٹی چیئرمین عمران خان کی اہلیہ کی مبینہ ڈائری کے حوالے سے خبروں کی تردید کرتے ہوئے کہا ہے کہ میڈیا ہاؤسز سمیت جس نے بھی یہ خبر چلائی ہے اس کے خلاف قانونی کارروائی کی جائے گی۔
سابق وزیر اعظم اور پاکستان تحریک انصاف ( پی ٹی آئی ) کے چیئرمین عمران خان کے وکیل انتظار حسین پنجوتھا نے سماجی رابطے کی ویب سائٹ ’ٹوئٹر‘ پر جاری کردہ ٹویٹ میں کہا ہے کہ ’لیگل ٹیم کی طرف سے یا زمان پارک کی طرف سے کسی ڈائری کی گمشدگی رپورٹ ہی نہیں کی گئی تو یہ ڈائری کہاں سے آگئی‘۔
ان کا کہنا ہے کہ ہم تفصیلات حاصل کر رہے ہیں اور تمام ذمہ داران کے خلاف قانونی کارروائی کریں گے ، یہ خبر جس جس نے چلائی ہے ان تمام میڈیا ہاؤسسز کے خلاف بھی کارروائی کریں گے اور نوٹس جاری کریں گے۔
واضح رہے کہ جمعہ کو ایک مبینہ ڈائری منظر عام پر آئی ہے جس کے بارے میں ذرائع ابلاغ میں دعویٰ کیا گیا ہے کہ یہ ڈائری پاکستان تحریک انصاف ( پی ٹی آئی ) کے چیئرمین عمران خان کی اہلیہ بشریٰ بی بی کی ذاتی ڈائری ہے جس کے کچھ صحفے لیک ہوگئے ہیں۔
