پاکستان سپر لیگ میں لاہور قلندر کی نمائندگی کرنے والے نوجوان فاسٹ باؤلر زمان خان ملتان سلطانز کے خلاف آخری اوور میں 15 رنز کا کامیابی سے دفاع کرنے پر جوش ہیں۔
نمائندہ وی نیوز کے مطابق زمان خان نے اس حوالے سے گفتگو کرتے ہوئے کہا ہے کہ مجھے معلوم تھا کہ کپتان شاہین شاہ آفریدی مجھے آخری اوور دیں گے۔
انہوں نے کہا کہ سوچ رہا تھا صرف اچھے یارکرز کروں گا، کپتان شاہین آفریدی نے آخری اوور کے لیے گیند دی تو کہا جو دماغ میں آتا ہے کرو، بس پریشر نہیں لینا۔
فاسٹ بائولر زمان خان نے کہا کہ خوشی ہے کہ لاہور قلندرز کو افتتاحی میچ میں کامیابی دلانے میں اپنا کردار ادا کیا ہے۔
واضح رہے کہ پی ایس ایل 8 کے پہلے میچ میں لاہور قلندر نے ملتان سلطان کو جیت کے لیے 175 رنز کا ہدف دیا، ملتان سلطان کو آخری اوور میں جیت کے لیے 15رنز درکار تھے، زمان خان نے آخری اوور کا کامیابی سے دفاع کیا اور لاہور قلندر نے ایک رنز سے میچ جیت لیا۔
