جشن آزادی کے موقع پر غیر ملکی نامور شخصیات نے پاکستان سے والہانہ محبت کا اظہار کرتے ہوئے اپنے پیغام میں کہاکہ تمام پاکستانیوں کو یوم آزادی کی خوشیاں مبارک ہوں اور آئندہ بھی اسی طرح جوش و جزبے سے جشن آزادہ مناتے رہیں۔
سلک روڈ انٹرنیشنل آرٹس سینٹر کی چیف ایگزیکٹو کلاڈیا یانگ نے کہاکہ میرے پیارے پاکستانی بھائیوں اور بہنوں کو یوم آزادی مبارک ہو، چین اور پاکستان کے درمیان تعلقات اور دوستی مزید بڑھتی رہے گی اور اسی طرح گرمجوشی قائم رہے گی۔
چائنا پاکستان فرینڈ شپ ایسوسی ایشن کے صدر امب شا زوکانگ نے کہاکہ یوم آزادیِ پاکستان مبارک ہو، پاکستان کے یوم آزادی کے اس موقع پر میں خوبصورت یادوں سے لبریز ہوں اور چائنا پاکستان فرینڈشپ ایسوسی ایشن کے صدر کی حیثیت سے مجھے یہ دن آپ سب کے ساتھ مناتے ہوئے خوشی ہو رہی ہے۔
’ہماری دوستی ان گہرے تاریخی رشتوں کا ثبوت ہے جو دونوں ممالک کے درمیان موجود ہیں۔‘
انہوں نے کہاکہ اپنے طویل سفارتی دور میں پاکستان کے ساتھ قریب سے کام کرنے کے بعد میں نے اس عظیم قوم کے جذبے، اور ترقی کا مشاہدہ کیا ہے، مجھے پائیدار دوستی قائم کرنے کی خوشی ملی ہے جس نے پاکستان میں میرے یقین کو مزید گہرا کر دیا ہے۔
مزید پڑھیں
ان کا کہنا تھاکہ چین اور پاکستان کے درمیان تعلقات پروان چڑھے ہیں، ہم ہمیشہ ایک دوسرے کے ساتھ کھڑے رہے ہیں، ایک دوسرے کا ساتھ دیا ہے اور چائنا پاکستان کمیونٹی کی مشترکہ تعمیر کے لیے کام کیا ہے۔
انہوں نے کہاکہ آج جب ہم پاکستان کا یوم آزادی منا رہے ہیں، میں کراچی سے خیبر تک ہر پاکستانی کو اپنی مخلصانہ مبارکباد اور دل کی گہرائیوں سے نیک تمناؤں کا اظہار کرتا ہوں۔
’دعا ہے کہ آہنی پوش دوستی دونوں ممالک اور سرحدی خطے میں امن اور خوشحالی کے لیے زیادہ سے زیادہ کردار ادا کرتی رہے گی۔‘
ریاستی نمائندہ برائے ٹیکساس ہاؤس ڈاکٹر سلیمان لالانی نے اپنے پیغام میں کہاکہ تمام قریب اور دور رہنے والے پاکستانیوں کو یوم آزادی بہت بہت مبارک ہو، میں اپنے پاکستانی امریکیوں سے خصوصی طور پر کہنا چاہتا ہوں کہ دونوں ممالک کی مثبتیت کو ظاہر کرنے اور امریکا پاکستان تعلقات کو مضبوط بنانے کے لیے کام کرنے کی دوہری ذمہ داری ہماری ہے۔
انہوں نے کہاکہ ہمیں صرف فنڈز کی سرمایہ کاری کے بارے میں نہیں بلکہ اپنے نوجوانوں میں سرمایہ کاری کے بارے میں سوچنے کی ضرورت ہے۔
