گورنر پنجاب محمد بلیغ الرحمان نے تمام اہل وطن اور اوور سیز پاکستانیوں کو یوم آزادی کی مبارکباد دیتے ہوئے کہاکہ آزادی ایک بہت بڑی نعمت ہے، آج ہم اپنے آباؤ اجداد کی بے پناہ قربانیوں کی وجہ سے آزاد فضا میں سانس لے رہے ہیں۔
پاکستان بانی پاکستان قائداعظم محمد علی جناح کی قیادت میں ہمارے اسلاف کی طویل جدوجہد کے نتیجے میں دنیا کے نقشے پر 14 اگست 1947 کو دن ایک آزاد مملکت کی حیثیت سے ابھرا۔ آج اس عہد کے تجدید کا دن ہے کہ پاکستان کی ترقی کے لیے باہمی اختلافات بھلا کر ایک قوم بن کر سوچیں گے۔
انہوں نے کہاکہ ملک کو درپیش چیلنجز کا مقابلہ صرف اور صرف اتحاد، یگانگت، باہمی رواداری اور بھائی چارے کو فروغ دے کر ہی کیا جاسکتا ہے۔ آج ہمیں یہ عہد کرنا ہے کہ ہم قائد اعظم محمد علی جناح کے بتائے گئے رہنما اصولوں اور شاعر مشرق علامہ محمد اقبال کے افکار کو عملی طور پر اپنی زندگیوں کا حصہ بنائیں گے۔
ان کا کہنا تھاکہ یہ ملک اور یہ سبز ہلالی پرچم ہماری پہچان اور شناخت ہے، آج افواج پاکستان اور سیکیورٹی فورسز کے ان شہداء کو بھی خراج تحسین پیش کرتا ہوں۔ جنہوں نے وطن عزیز کی خاطر اپنی جانوں کے نذرانے دیے۔
مزید پڑھیں
گورنر پناجب نے کہاکہ آج بحیثیت قوم ہمیں اس بات کا عزم کرنا ہے کہ ہمیں اپنی اپنی ذمہ داریاں ایمانداری سے ادا کرنی ہیں اور اجتماعی سوچ کا مظاہرہ کرنا ہے۔
حمزہ شہباز کا قوم کے نام پیغام
دوسری جانب یوم آزادی پر سابق وزیراعلٰی پنجاب و نائب صدر مسلم لیگ ن حمزہ شہباز نے اپنے پیغام میں کہاکہ یوم آزادی ہمارے لیے تشکر کا دن ہے، اس اہم دن کی مناسبت سے ملک کے لیے قربانیاں دینے والوں کو خراج تحسین پیش کرتے ہیں۔
حمزہ شہباز نے کہاکہ پاکستان کو درپیش مسائل کا حل آئین و پارلیمنٹ کی بالادستی، قانون کی حکمرانی اور جمہوریت میں پنہاں ہے۔ زندگی کا حقیقی احساس آزادی کی عظیم نعمت کے بغیر ادھورا ہے۔ آج کے دن ہم ایک ایسے پاکستان کا عہد کریں جو پُر امن ترقی پسند اور روادار ہو۔
انہوں نے کہاکہ پاکستان پر چھائے گہرے بادل اب چھٹنا شروع ہو گئے ہیں اور انشاللہ جلد ہی باقی چیلنجز سے بھی نمٹیں گے۔
