اورنگی اور گجر نالے کے متاثرین کو معاوضوں کی ادائیگی سے متعلق کیس میں سپریم کورٹ نے وزیراعلٰی سندھ مراد علی شاہ کو توہین عدالت کے نوٹس جاری کرتے ہوئے ایڈووکیٹ جنرل سندھ، چیف سیکریٹری اور کمشنر کراچی کو کل عدالت طلب کرلیا ہے۔
کراچی رجسٹری میں جسٹس محمد علی مظہر اور جسٹس سید حسن اظہر رضوی پر مشتمل سپریم کورٹ کے خصوصی بینچ نے کراچی کے گجراور اورنگی نالے پر کارروائی سے متعلق عمل درآمد کیس کی سماعت کی۔
متاثرین کی جانب سے دائر درخواست میں موقف اپنایا گیا ہے کہ سپریم کورٹ نے متاثرین گجر نالہ کو متبادل رہائش دینے کا براہ راست حکم وزیراعلی سندھ مراد علی شاہ کو دیا تھا، جنہوں نے اس پرعملدرآمد نہ کرکے توہین عدالت کا ارتکاب کیا ہے۔
درخواست گزار وکیل فیصل صدیقی نے عدالت کو بتایا کہ سپریم کورٹ نے 25 اکتوبر 2021 میں آخری حکم دیا تھا۔ جس پر جسٹس محمد علی مظہر نے توہین عدالت کی درخواست بابت استفسار کیا جس پر فیصل صدیقی نے بتایا کہ سندھ حکومت نے اورنگی اور گجر نالوں کے متاثرین کی بحالی کی حامی بھری لیکن دو سال ہوچکے کسی ایک شخص کو گھر نہیں ملا۔
جسٹس محمد علی مظہربولے؛ سندھ حکومت نے دو سال میں بحالی کا پلان دیا، آپ دو تین ماہ پہلے ہی سپریم کورٹ آگئے۔ جس پر فیصل صدیقی نے کہا کہ پہلے اس لیے آئے کیونکہ کوئی ایک کام نہیں ہوا، گھروں کے علاوہ شہری سہولیات بھی فراہم کرنا تھیں اور اس ضمن میں سندھ حکومت کو ہر ماہ پیش رفت رپورٹ دینا تھی۔
جسٹس محمد علی مظہرنے دریافت کیا کہ کیا چیف سیکرٹری کی کوئی رپورٹ پیش کی گئی ہے۔ کیا متاثرین نے سندھ حکومت سے رابطہ کیا؟ کیا اس معاملے میں کوئی فوکل پرسن ہے؟ کیونکہ غریب آدمی براہ راست وزیراعلی سندھ سے کیسے رابطہ کرے گا،غریب آدمی تو وزیراعلی سندھ ہاؤس میں داخل نہیں ہوسکتا۔
گجر نالہ، اورنگی نالہ متاثرین کیس کی سماعت کے بعد عدالت نے وزیراعلی سندھ مراد علی شاہ کو توہین عدالت کے نوٹس جاری کرتے ہوئے ایڈووکیٹ جنرل سندھ، چیف سیکریٹری، اور کمشنر کراچی کو کل عدالت طلب کرلیا ہے۔
سپریم کورٹ کے دو رکنی بینچ نے ریمارکس دیے کہ وزیراعلی سندھ کی طلبی کا معاملہ چیف سیکرٹری کی رپورٹ کے بعد دیکھیں گے، وزیراعلی ایک دو روز کے رہ گئے، انہیں جیل بھیج کر کیا کریں گے۔
