گزشتہ روز کراچی کے علاقے صدر میں ٹریفک پولیس اہلکار سے بدتمیزی کرنے والے شخص کی ایک ویڈیو وائرل تھی جس کے بارے میں پولیس کا کہنا ہے کہ وہ حساس ادارے کا افسر ہے۔
گزشتہ روز سے سوشل میڈیا کے مختلف پلیٹ فارمز پرگردش کرتی ویڈیو میں دیکھا جا سکتا ہے کہ کراچی کے علاقے صدر میں ٹریفک پولیس کے اہلکارایک گاڑی کو روکتے ہیں تو گاڑی میں سوار 2 افراد ٹریفک پولیس اہلکاروں کو دھمکیاں دینا شروع کر دیتے ہیں۔ ایک شخص ٹریفک پولیس اہلکاروں سے کہتا ہے کہ ’آپ گاڑی کو روک کر دکھائیں، ملٹری پولیس کو بلائیں، ملٹری پولیس آئے گی پہلے۔‘
ٹریفک پولیس حکام نے مذکورہ واقعے کی وضاحت کرتے ہوئے بتایا ہے کہ ٹریفک پولیس افسر سے بدتمیزی کرنے والا شخص حساس ادارے کا افسر ہے۔
آپ خود اندازہ کرلیں۔۔
۔کتنا مشکل ہوتا لگثری گاڑیوں کے خلاف ایکشن لینے میں۔
پڑھا لکھا نظر آنے میں اور تعلیم یافتہ ہونے میں بڑا فرق ہے۔ pic.twitter.com/AuCWJc3UHN— صحرانورد (@Aadiiroy2) August 17, 2023
ٹریفک پولیس نے واقع کی تفصیل بتائی کہ حساس ادارے کے افسر کی گاڑی پر فینسی نمبر پلیٹ تھی جسے اتارںے پر اس افسر نے ٹریفک پولیس اہلکار سے بدتمیزی کی۔ پولیس نے یہ بھی بتایا کہ بدتمیزی کرنے والے شخص کے خلاف متعلقہ ادارے کو خط لکھا ہے۔
ٹریفک حکام ان خبروں کی تردید کی ہے کہ متعلقہ ٹریفک پولیس افسر کے خلاف کوئی کارروائی ہوئی ہے۔ پولیس حکام نے وضاحت کی کہ پولیس افسر نے قانون کے مطابق گاڑی سے فینسی نمبر پلیٹ بھی اتاری اور بدتمیزی کرنے والے حساس ادارے کے افسر کا چالان بھی کیا۔
