وزیر مذہبی امور انیق احمد سے سعودی سفیر نواف سعید المالکی نے ملاقات کی۔ وزارت مذہبی امور کے ترجمان کے مطابق ملاقات میں سعودی ڈپٹی منسٹر ڈاکٹر حسن مناخرہ، سیکرٹری مذہبی امور، ڈی جی حج بھی شریک تھے ۔
وزیر حج ڈاکٹر توفیق الربیعہ کی سربراہی میں سعودی وفد کے دورہ پاکستان پر تبادلہ خیال کیا۔وزیر مذہبی امور انیق احمد نے کہا کہ سعودی وفد کا دورہ پاکستان تاریخی اہمیت کا حامل ہو گا۔
سعودی وزیر حج مسجد الحرام اور مسجد نبویؐ کے چیئرمین ہونے کی وجہ سے انتہائی محترم ہیں، سعودی وفد سے حج، عمرہ، روٹ مکہ، مذہبی سیاحت کے فروغ سمیت باہمی دلچسپی کے امور پر تبادلہ خیال ہو گا۔
وفاقی وزیر نےکہا کہ آئندہ حج انتظامات میں جدت اور بہتری کے لیے ایم او یو سائن کیے جائیں گے۔ سعودی شاہ سلمان کے لیے پاکستان نہایت اہمیت کا حامل ہے، ولی عہد محمد بن سلمان نے خود کو پاکستان کا سفیر قرار دیا تھا۔
اس موقع پر سعودی سفیر نے کہاکہ پاکستان ان کا دوسرا گھر ہے، ہم پاکستانی بھائیوں کو بہت اہمیت دیتے ہیں۔
