انسداد دہشتگردی عدالت نے جناح ہاوس حملے میں گرفتار تحریک انصاف کی سابقہ وزیریاسمین راشد اور سابق گورنر پنجاب عمر سرفراز چیمہ اور خدیجہ شاہ سمیت دیگر کے جوڈیشل ریمانڈ میں 11 دن کی توسیع کردی۔
9 مئی واقعات میں جلاؤ گھیراؤ کے مقدمات میں ملوث گرفتار پی ٹی آئی کی رہنما یاسمین راشد اور عمر سرفراز چیمہ اور خدیجہ شاہ سمیت دیگر کو لاہور کی انسداد دہشت گردی عدالت میں جوڈیشل ریمانڈ کی معیاد ختم ہونے پر پیش کیا گیا۔
مزید پڑھیں
انسداد دہشت گردی عدالت کے جج اعجاز احمد بٹر نے کیس پر سماعت کی، تفتیشی افسر نے عدالت کے سامنے مؤقف اختیار کرتے ہوئے کہاکہ ڈاکٹر یاسمین راشد پر ماڈل ٹاؤن میں مسلم لیگ نون آفس پر حملے، عسکری ٹاور پر حملے اور تھانہ شادمان کو جلانے کا الزام ہے۔
تفتیشی افسر نے استدعا کی کہ یاسمین راشد اور عمر سرفراز چیمہ کی چار مقدمات میں جوڈیشل ریمانڈ میں توسیع کی جائے۔
عدالت نے یاسمین راشد اور عمر سرفراز چیمہ کے جوڈیشل ریمانڈ میں 11 دن کی توسیع کرتے ہوئے انہیں یکم ستمبر کو دوبارہ پیش کرنے کا حکم دے دیا۔
واضح رہے عمر سرفراز چیمہ طبعیت کی خرابی کے باعث ویل چیئر پر عدالت میں پیش ہوئے۔