پاکستان نے افغانستان کے خلاف 3 ایک روزہ میچوں کی سیریز کا پہلا میچ 142 رنز سے جیت لیا۔
سری لنکا کے شہر ہمبنٹوٹا میں کھیلے جانے والے میچ میں پاکستان نے ٹاس جیت کر پہلے بیٹنگ کرنے کا فیصلہ کرتے ہوئے افغانستان کو جیت کے لیے 202 رنز کا ٹارگٹ دیا تھا جس کے جواب میں افغان ٹیم 19 اعشاریہ 2 اوورز میں محض 59 رنز بناکر آؤٹ ہوگئی۔
پاکستان کی بیٹنگ
پاکستان نے پہلے کھیلتے ہوئے 201 رنز بنائے تھے۔ محمد رضوان 21، آغا سلمان 7 ، افتخار احمد 30، شاداب خان 39، فخر زمان، اسامہ میر اور شاہین شاہ آفریدی 2، 2 جبکہ حارث رؤف ایک رن بنا کر آؤٹ ہوگئے، امام الحق نے سب سے زیادہ 61 رنز بنائے۔ کپتان بابر اعظم بغیر کھاتا کھولے پویلین لوٹ گئے تھے، جبکہ نسیم شاہ 18 رنز بنا کر ناٹ آؤٹ رہے۔
افغانستان کی جانب سے مجیب الرحمٰن نے سب سے زیادہ 3 وکٹیں حاصل کیں، محمد نبی اور راشد خان نے 2،2 کھلاڑیوں کو آؤٹ کیا، رحمت شاہ اور فضل حق فاروقی نے ایک ایک کھلاڑی کو آؤٹ کیا، جبکہ مجیب الرحمٰن نے ایک کھلاڑی کو رن آؤٹ بھی کیا۔
افغانستان کی بیٹنگ
افغانستان کی جانب سے رحمان اللہ گرباز 18، عظمت اللہ 16 ،مجیب الرحمان 4، عبدالرحمان نے 2 رنز بنائے۔ جبکہ محمد نبی 7 رنز بنا سکے۔
پاکستان کی جانب سے حارث رؤف نے 5 کھلاڑیوں کو پویلین کی راہ دکھائی، شاہین شاہ آفریدی نے 2، جبکہ نسیم شاہ اور شاداب خان نے ایک ایک کھلاڑی کو آؤٹ کیا۔
ایشیا کپ سے پہلے کھیلی جانے والی اس سیریز کو بہت اہم سمجھا جارہا ہے۔ 3 میچوں پر مشتمل سیریز کے پہلے میچ میں پاکستان کے کپتان بابر اعظم نے ٹاس جیت کر پہلے بیٹنگ کرنے کا فیصلہ کیا تھا۔ پاکستان نے محمد نواز کی جگہ اسامہ میر کو ٹیم میں شامل کیا تھا۔ دوسری طرف آل راؤنڈر فہیم اشرف کو بھی موقع نہیں دیا گیا۔
مزید پڑھیں
ٹاس کے موقع پر گفتگو کرتے ہوئے پاکستان کرکٹ ٹیم کے کپتان بابر اعظم نے کہا تھا کہ اچھا ٹوٹل کر کے افغانستان پر دباؤ بڑھائیں گے۔
سیریز سے قبل میزبان افغانستان کو بڑا دھچکا اس وقت لگا جب ٹیم کے اہم کھلاڑی نجیب اللہ زادران گھٹنے کی انجری کے سبب سیریز سے باہر ہو گئے تھے۔
یہ سیریز پاکستان کے لیے اس لیے بھی اہم ہے کہ اسپنرز کے خلاف درپیش مشکلات کو قابو کرنے میں مدد مل سکے گی اور ایک روزہ میچ میں کھلاڑیوں کو لمبی اننگ کھیلنے کا موقع بھی مسیر آجائے گا۔
دونوں ٹیموں کے درمیان دوسرا میچ 24 جبکہ تیسرا اور آخری میچ 26 اگست کو کھیلا جائے گا۔
