قیامت خیز زلزلے سے متاثرہ ترکیہ کے لیے جہاں دنیا بھر سے امدادی سامان بھیجنے کا سلسلہ جاری ہے وہیں قطر نے گزشتہ برس فیفا ورلڈ کپ کے لیے بنائے گئے 10 ہزار موبائل گھر ترکیہ کو عطیہ کردیے ہیں۔
میڈیا رپورٹس کے مطابق قطر نے ترکیہ کے زلزلہ متاثرین کی مدد کے لیے گزشتہ سال فیفا ورلڈ کپ کے لیے بنائے گئے 10 ہزار موبائل گھر ترکیہ کو عطیہ کرنے کے اعلان کے بعد اس سلسلہ میں ساڑھے 3 سو گھروں کی پہلی کھیپ ترکیہ روانہ بھی کردی ہے۔
رپورٹ کے مطابق فیفا ورلڈ کپ میں قطر نے دنیا بھر سے آنے والے شائقین فٹبال کو رہائشی سہولت فراہم کرنے کے لیے 10 ہزار موبائل گھر اس ارادے کے ساتھ بنائے تھے کہ ورلڈ کپ کے اختتام کے بعد یہ گھر کسی ضرورت مند کو عطیہ کردے گا۔
ترکیہ اور شام میں 7.8 شدت کے زلزلے میں اب تک 40 ہزار سے زائد اموات ہوچکی ہیں۔ ہزاروں گھر وں کے زمیں بوس ہو نے کے باعث لاکھوں لوگ بے گھر ہو چکے ہیں۔ ملبے تلے دبے لوگوں کی تلاش تاحال جاری ہے جس کے باعث ہلاکتوں میں مزید اضافے کا خدشہ ظاہر کیا جا رہا ہے۔
یاد رہے کہ قطر اور دیگر خلیجی ممالک نے زلزلہ متاثرین کی امداد کے لیے کی جانے والی کاوشوں میں بھرپور حصہ لیا ہے۔ متحدہ عرب امارات نے 10 کروڑ ڈالرز کی امداد سمیت ترکیہ میں سب سے بڑا فیلڈ اسپتال بھی قائم کردیا ہے جبکہ سعودی عرب اب تک امدادی سامان کے 8 جہاز ترکیہ اور شام بھیج چکا ہے۔
