کینیا کی ایتھلیٹس فیتھ کیپیگون نے عالمی ایتھلیٹکس چیمپئن شپ 2023 میں خواتین کی 1500 میٹر کی دوڑ جیت کر تاریخ رقم کر دی، ایتھوپیا کی ڈیریبی ویلٹیجی دوسرے اور نیدر لینڈ کی سیفان حسن تیسرے نمبر پر رہیں۔
ہنگری کے دارالحکومت بڈا پسٹ میں ہونے والے عالمی ایتھلیٹکس چیمپئن شپ 2023 میں خواتین کی دوڑ میں کینیا کی ایتھلیٹس فیتھ کیپیگون شروع سے ہی آگے رہیں اور اپنے عالمی ٹائٹل کا کامیابی سے دفاع کیا، انہوں نے سونے کا تمغہ حاصل کیا، اس سے قبل رواں سال جون میں فیتھ کیپیگون نے خواتین کی 5 ہزار میٹر دوڑ کا نیا ورلڈ ریکارڈ قائم کیا تھا۔
ایتھلیٹکس چیمپئن شپ 2023 میں خواتین کی 1500 میٹر کی دوڑ میں ایتھوپیا کی دیریبی ویلٹیجی دوسرے نمبر پر رہیں، نیدر لینڈ کی سیفان حسن تیسرے نمبر پر اور آئرلینڈ کی سیارا مگیان چوتھے نمبر پر رہیں۔
فیتھ کیپیگون نے کہا ہے کہ ’عالمی ریکارڈ ہولڈر اور دفاعی چیمپئن کے طور پر آپ آگے جا کر ریس کو کنٹرول کرتے ہیں اور صرف دوڑتے ہیں تو میں نے بھی دوڑ لگائی، یہ دوڑ مجھے آسان لگی۔‘
انہوں نے کہا کہ اس جیت سے ان کو نیا حوصلہ ملا ہے اور وہ جانتی ہیں کہ ان کے لیے سب کچھ ممکن ہے۔
نیدر لینڈ کی سیفان حسن کا کہنا ہے کہ ’میں کچھ ہی ہفتے پہلے میراتھن گیمز سے آئی تھی اور میری کوشش تھی کہ میں اپنی رفتار دوبارہ حاصل کروں، میں نے اپنے کوچ سے بھی بات کی، میں میراتھن گیمز جیت کر آئی ہوں، میں حیران ہوں کہ اس سال لڑکیاں تیز دوڑیں۔‘
