سابق وزیراعظم پاکستان نواز شریف نے کہا ہے کہ چیف جسٹس پاکستان عمران خان کو بچانے پر مُصر ہیں۔ سب کو معلوم ہے کہ اس شخص کو لانے والے جنرل باجوہ اور جنرل فیض حمید تھے۔ اس ایک شخص کے لیے چیف جسٹس اپنے کیریئر کو داؤ پر لگا رہا ہے۔
لندن میں میڈیا سے گفتگو کرتے ہوئے سابق وزیراعظم نواز شریف نے کہاکہ عمران خان توشہ خانہ سے لے کر القادر ٹرسٹ تک کرپشن میں ملوث ہے۔ سب جانتے ہیں کہ اس شخص نے پاکستانی قوم کی اخلاقیات کو تباہ کیا۔
مزید پڑھیں
نواز شریف نے کہاکہ پی ٹی آئی جب اپوزیشن میں تھی تو انہیں نے دھرنوں کے علاوہ کچھ نہیں کیا۔ ہم نے اس وقت بھی قوم کے خدمت کی۔
سابق وزیراعظم نے کہاکہ عمران خان جب اقتدار میں آیا اور ہم جیل میں تھے تو امریکا میں جا کر بحیثیت وزیراعظم خطاب کرتے ہوئے کہا گیا کہ نواز شریف کی بیرک سے اے سی اتاروں گا۔
انہوں نے کہاکہ دھرنوں میں کہا گیا کہ نواز شریف کو گلے سے پکڑ کر وزیراعظم ہاؤس سے نکالوں گا۔ یہ بات ریکارڈ پر ہے کہ اس وقت کے چیف جسٹس ثاقب نثار نے کہا تھا کہ ہم نے نواز شریف اور مریم نواز کو جیل سے باہر نہیں آنے دینا۔
واضح رہے کہ قائد ن لیگ نواز شریف اس وقت لندن میں موجود ہیں، ان کی پارٹی کے رہنماؤں کی جانب سے بار بار یہ کہا جا رہا ہے کہ نواز شریف جلد وطن واپس آئیں گے، اور آئندہ عام انتخابات میں انتخابی مہم کی قیادت کریں گے، مگر ابھی تک ان کی واپسی کی کوئی حتمی تاریخ سامنے نہیں آ سکی۔
سابق وزیر دفاع خواجہ آصف ایک ٹی وی پروگرام میں گفتگو کرتے ہوئے یہ کہہ چکے ہیں کہ نواز شریف 15 ستمبر کے بعد کسی بھی وقت واپس آ سکتے ہیں،’ 15 ستمبر کا جب ذکر آتا ہے تو اس کو اس بات سے جوڑا جاتا ہے کہ موجودہ چیف جسٹس پاکستان کی ریٹائرمنٹ کے بعد نواز شریف پاکستان آئیں گے‘۔
