چیئرمین سینیٹ محمد صادق سنجرانی سے اسلام آباد میں امریکی وفد نے ملاقات کی جس میں ریپبلکن ڈیرن لاہود اور پاکستان میں امریکی سفیر ڈونلڈ بلوم شامل تھے۔
ملاقات میں دوطرفہ تعلقات سمیت باہمی دلچسپی کے امور پر اور دونوں ملکوں اور دوطرفہ تعلقات کو مزید مستحکم بنانے کے حوالے سے بات چیت کی گئی۔
علاقائی سلامتی، اقتصادی تعاون، تجارتی شراکت داری اور عوام سے عوام کے تبادلے سمیت مختلف موضوعات پر بھی تبادلہ خیال کیا گیا۔
چیئرمین سینیٹ محمد صادق سنجرانی نے مشترکہ چیلنجز سے نمٹنے اور خطے میں امن واستحکام کے فروغ کے لیے دونوں ممالک کے درمیان مذاکرات جاری رکھنے کی اہمیت پر زور دیتے ہوئے کہا کہ تعلیم، صحت اور ٹیکنالوجی کے شعبوں میں تجارتی تعلقات اور تعاون کو بڑھانے کی ضرورت ہے۔
امریکی وفد نے علاقائی استحکام کو برقرار رکھنے میں پاکستان کی کوششوں کو سراہتے ہوئے دونوں ممالک کے درمیان موجودہ تعلقات کو مزید بہتر بنانے اور باہمی دلچسپی کے امور پر باہمی تعاون کے ساتھ کام کرنے کے عزم کا بھی اظہار کیا۔
ملاقات میں ایک دوسرے کے مثالی جمہوری طریقوں سے باہمی طور پر مستفید ہونے کے حوالے سے بھی گفتگو کی گئی اور پارلیمانی تعلقات اور ادارہ جاتی تعاون کو مزید فروغ دینے پر زور دیتے ہوئے دونوں ممالک کے درمیان تجربات کے تبادلے کی اہمیت کو اجاگر کیا گیا۔
چیئرمین سینیٹ نے کہا کہ پاکستان افغانستان میں امن کا خواہاں ہے۔ انہوں نے مزید کہا کہ پاکستان نے دہشت گردی کی وجہ سے بہت نقصان اٹھایا ہے۔
صادق سنجرانی کا کہنا تھا کہ دہشت گردی کے خلاف جنگ میں ملک کے 80 ہزار افراد کی جانیں گئیں ہیں اور ملک نے معاشی مشکلات کا بھی سامنا کیا جب کہ املاک کو بھی خاصا نقصان پہنچا۔
انہوں نے کہا کہ پاکستان افغان مسئلے کا پرامن حل چاہتا ہے اور ہمیں امن اور ترقی کے لیے مل کر کام کرنے کی ضرورت ہے۔
چیئرمین سینیٹ نے ملاقات کے دوران مسلہ کشمیر کو بھی اجاگر کرتے ہوئے کہا کہ مسئلہ کشمیر کو اقوام متحدہ کی قراردادوں کے مطابق حل کرنے کی ضرورت ہے۔
صادق سنجرانی نے کہا کہ بے گناہ کشمیریوں کو تشدد کا نشانہ بنایا جا رہا ہے لہٰذا امریکا انسانی حقوق کا سب سے بڑا حامی ہونے کے ناتے آگے آکر مقبوضہ کشمیر کے معصوم کشمیریوں کے لیے آواز اٹھائے
پاکستان آکر خوشی ہوئی، امریکی رکن کانگریس
امریکی رکن کانگریس ڈیرن لاہودکا کہنا تھا کہ پاکستان کے ساتھ تعلقات ہمارے لیے اہم ہیں اور ہم 2 طرفہ تعاون کو مزید فروغ دینے کے لیے یہاں آئے ہیں۔ ان کا کہنا تھا کہ دونوں ممالک کے باہمی تعلقات تاریخی، متحرک اور دیرپا ہیں۔
