’وی آئی پی روٹ‘ کے راستہ روکنے پر پشاور میں جج کا انوکھا احتجاج

خیبرپختونخوا کے دارالحکومت پشاور میں لگائے گئے ’وی آئی پی روٹ‘ تقریبا روزانہ ہی عام مسافروں کا راستہ روکتا ہے۔ جمعرات کو یہ روٹ ایک جج کا راستہ روکنے کا باعث بنا تو اس کے خلاف انوکھے احتجاج کی اطلاع سامنے آئی۔

پشاور سے تعلق رکھنے والے صحافی اور ٹیلی ویژن میزبان لحاظ علی نے ایک ویڈیو شیئر کی، اس کے ساتھ لکھا کہ ’پشاور کے خیبر روڈ کو روزانہ انسپکٹر جنرل (آئی جی) فرنٹیئر کور کی آمد اور رخصتی کے وقت بند کیا جاتا ہے۔‘

لحاظ علی کے مطابق ’جمعرات کو جب جسٹس صاحبزادہ اسد اللہ کو ہائی کورٹ جانے سے روکا گیا تو انہوں نے خیبر روڈ پر گاڑی روک کر احتجاج کیا اور گاڑی سے اتر کر پیدل پشاور ہائی کورٹ چلے گئے۔‘

https://twitter.com/TheLehaz/status/1694586990048465017

ویڈیو پر تبصرہ کرنے والے افراد کی اکثریت نے ’وی آئی پی روٹ‘ سے متعلق اپنے ناخوشگوار تجربات شیئر کرتے ہوئے یہ سلسلہ روکے جانے کی خواہش ظاہر کی۔

پشاور ہی کے ایک اور صحافی سید وقاص شاہ ترمذی نے پوچھا کہ ’ایف سی کو تو حیات آباد میں پورا سیکٹر دے دیا گیا آئی جی صاحب کیوں شفٹ نہیں ہو جاتے۔‘

پشاور ہائی کورٹ کے جسٹس صاحبزادہ اسد اللہ خان روڈ کی بندش پر برہم ہوئے تو پشاور پولیس فعال ہوئی۔

پولیس کی جانب سے بتایا گیا کہ ایف سی نے وی آئی پی مومنٹ کے لیے روڈ بند کیا ہوا تھا۔ جسٹس گاڑی اور اسکواڈ چھوڑ کر پیدل ہائی کورٹ چلے گئے۔

پولیس نے تصدیق کی کہ ایف سی کے آئی جی روڈ سے گزر رہے تھے، پولیس کی جانب سے روڈ کلئیر کر دیا گیا۔