ریلوے ٹریک پر ہاتھ میں بجلی کے دو بل پکڑ کر کھڑے ایک ریڑھی بان نے حکمرانوں سے اپیل کی ہے کہ ’خدارا ہمارے حال پر رحم کریں۔‘
جمعرات کو سوشل ٹائم لائنز پر وائرل ہونے والی ایک ویڈیو میں پاکستانی صوبہ پنجاب کے ایک مکین روتے ہوئے حکمرانوں سے التجا کر رہے ہیں کہ انہیں ریلیف دینے کے لیے اقدامات کیے جائیں۔
ویڈیو میں گفتگو کرنے والے فرد نے اپنا تعارف کرائے بغیر کی گئی گفتگو میں بتایا کہ ’گزشتہ ماہ زیادہ بل آیا تو قسطیں کرائی تھیں۔ اس مرتبہ پھر 12 ہزار روپے کا بل بھیج دیا گیا ہے۔‘
’سارا دن ٹھیلا چلا کر شام کو 500 کے نوٹ کا منہ دیکھتا ہوں۔ دو بچے ہیں اور کرائے کے مکان میں رہتا ہوں، ایسے میں 12 ہزار روپے کا بل کہاں سے بھروں۔‘
یہ تکلیف دہ کلپ دیکھیے….
ملک کے فیصلے کرنے والوں، بڑی بڑی تنخواہیں لینے والوں کی تو رہائش، بجلی، پٹرول، گاڑی سب مفت، اور سارا بوجھ اٹھانے والی عوام کی یہ حالت ہو چکی ہے…
کیا ان لوگوں کو اپنی موت بالکل ہی بھولی ہوئی ہے pic.twitter.com/T7lKnu1eSR— حفصہ (@hafsakamran2) August 24, 2023
اپنی مشکلات کا ذکر کرنے والے شہری کا کہنا تھا کہ ’ابھی تو گیس کا بل بھی آنا ہے۔‘
بجلی کی بڑھی قیمت اور زیادہ بل سے پریشان شہری کی ویڈیو پر تبصرہ کرنے والے افراد نے غم وغصہ کا اظہار کیا تو ’ملک کے فیسلے کرنے والوں‘ کو صورتحال کا ذمہ دار ٹھہرایا۔
حفصہ نے لکھا کہ ’ملک کے فیصلے کرنے والوں، بڑی بڑی تنخواہیں لینے والوں کی تو رہائش، بجلی، پٹرول، گاڑی سب مفت، اور سارا بوجھ اٹھانے والی عوام کی یہ حالت ہو چکی ہے… کیا ان لوگوں کو اپنی موت بالکل ہی بھولی ہوئی ہے۔‘
