پاکستان تحریک انصاف (پی ٹی آئی) کے زیراہتمام کراچی میں عمران خان سے اظہار یکجہتی کے لیے نکالی جانے والی ریلیوں پر پولیس نے لاٹھی چارج کیا ہے، اس دوران متعدد کارکنوں کو حراست میں لے لیا گیا ہے۔
پی ٹی آئی کے کارکنوں کی جانب سے شاہراہِ فیصل سمیت دیگر علاقوں میں ریلیاں نکالی گئیں، پولیس کا موقف ہے کہ دفعہ 144 کی خلاف ورزی پر کارروائی کی گئی ہے۔
مزید پڑھیں
دوسری جانب پی ٹی آئی کی جانب سے کارکنوں پر لاٹھی چارج کی شدید مذمت کی گئی ہے۔
پی ٹی آئی کراچی کے صدر خرم شیر زمان نے کہاکہ پولیس کی جانب سے پرامن ریلی کے شرکا پر بدترین لاٹھی چارج کیا گیا، انہوں نے سوال اٹھایا کہ کیا ریلی میں شریک ہونے والے کارکنان نے کسی مقام پر قانون کی خلاف ورزی کی؟۔
ان کا کہنا تھا کہ جمہوری نظام پرامن ریلیوں اور مظاہرے کی اجازت دیتا ہے، سندھ پولیس جمہوری روایات کی خلاف ورزی سے کیا پیغام دینا چاہتی ہے۔
انہوں نے کہاکہ پرامن ریلی پر تشدد کر کے شرکا میں خو ف و ہراس پھیلانا شرمناک عمل ہے۔