استحکام پاکستان پارٹی (آئی پی پی) کی مرکزی سیکریٹری اطلاعات ڈاکٹر فردوس عاشق اعوان نے کہا ہے کہ مہنگائی کی وجہ سے عوام کا جینا دو بھر ہو چکا ہے، غریب عوام کا کوئی پرسان حال نہیں۔ استحکام پاکستان پارٹی اقتدار میں آکر 300 یونٹ تک بجلی فری کرے گی۔
اتوار کو اپنے ایک بیان میں انہوں نے کہاکہ ایک طرف مہنگائی کا طوفان ہے اوپر سے بجلی کی قیمتوں میں ہوشربا اضافہ کردیا گیا۔ موجودہ حالات نے عام آدمی کی زندگی اجیرن کر دی ہے۔
انہوں نے کہاکہ بجلی کی قیمتیں آسمان سے باتیں کر رہی ہیں۔ حالیہ بلوں کی ادائیگی عام آدمی کے بس کی بات نہیں، آمدن سے زیادہ بل آنے کی وجہ سے لوگوں کا جینا دشوار ہو چکا ہے۔
مزید پڑھیں
ان کا کہنا تھا کہ استحکام پاکستانی پارٹی عوام دوست جماعت ہے، ہم نے عوام کی جانب دوستی کا ہاتھ بڑھایا ہے۔ یقین ہے کہ آنے والے انتخابات میں عوام اس دوستی کے ہاتھ کو ضرور تھامیں گے۔
فردوس عاشق اعوان نے کہاکہ عوام اور استحکام پاکستان پارٹی مل کر ترقی کا یہ سفر طے کریں گے۔ ہماری جماعت عوامی مسائل کو حل کرنے کے لیے بنی ہے۔
ان کا کہنا تھا کہ فی گھرانہ 300 یونٹ تک فری بجلی ہمارے منشور کا حصہ ہے۔ اس کے علاوہ غریب عوام کو مسائل سے نجات دلانے کے بہت سے منصوبے ہیں۔
انہوں نے نگراں حکومت سے مطالبہ کیا کہ عوامی مسائل ترجیحی بنیادوں پر حل کیے جائیں۔
