پنجاب کے علاقے پاکپتن میں ناخلف بیٹے کی جانب سے بوڑھے باپ کو تشدد کا نشانہ بنانے کا واقعہ پیش آیا ہے۔
بیٹے نے 4 کنال اراضی نہ دینے پر اپنے دوست کے ہمراہ بوڑھے باپ کو زمین پر لٹا کر تشدد کا نشانہ بنایا۔
واقعہ پاکپتن میں تھانہ فرید نگر کے علاقے میں پیش آیا ہے، گلشن کالونی میں رہائش پذیر غلام رسول کا بیٹا فہد رسول اپنے دوست طیب کے ہمراہ باپ کے گھر میں داخل ہوا اور بوڑھے شخص کو تشدد کا نشانہ بنایا۔
ملزم کی جانب سے پہلے گھر میں لوٹ مار کی گئی، زیورات اور نقدی ہتھیانے کے بعد پہلے بھائی کو تشدد کا نشانہ بنایا اور پھر بوڑھے باپ پر ٹوٹ پڑا، اس دوران بے دردی سے جوتے اور لاتیں مارتا رہا۔
ملزم نے تشدد کے دوران اپنے باپ کو قتل کی دھمکیاں بھی دیں، لڑکے کی اہلیہ بھی اس کے ساتھ تھی جو سسر کو گالیاں دیتی رہی۔
کالونی میں شور کی آواز سن کر محلے کے لوگ اکٹھے ہو گئے جنہوں نے بوڑھے شخص کی جان بچائی اور ملزمان کو کمرے میں بند کر کے پولیس کو اطلاع دی۔
پولیس نے موقع پر پہنچ کر ملزمان کو گرفتار کر لیا اور متاثرہ شخص غلام رسول کی مدعیت میں مقدمہ درج کر لیا ہے۔
