انسداد دہشت گردی عدالت نے ایڈوکیٹ ایمان مزاری اور علی وزیر کی ضمانت بعد از گرفتاری منظور کرلی ،
عدالت نے 30، 30 ہزار روپے کے مچلکوں کے عوض دونوں کی ضمانت منظور کرتے ہوئے انہیں رہا کرنے کا حکم دے دیا۔
یاد رہے کہ سابق رکن قومی اسمبلی علی وزیر اور سابق وفاقی وزیر شیریں مزاری کی بیٹی ایمان مزاری کوانیس اور بیس اگست کی درمیانی شب اسلام آباد سے گرفتار کیا گیا تھا۔
سابق ایم این اے علی وزیر کو ترنول سے گرفتار کیا گیا۔ اسلام آباد پولیس کے مطابق انھیں کارسرکار میں مداخلت پر گرفتار کیا گیا ہے۔ جبکہ ایمان مزاری کو ان کے گھر سے گرفتار کیا گیا تھا۔
شیریں مزاری نے ایک ٹویٹ کے ذریعے دعویٰ کیا تھا’ ابھی ابھی لیڈی پولیس اور سادہ کپڑوں میں ملبوس لوگ ہمارے گھر کا سامنے والا دروازہ توڑ کر میری بیٹی کو اپنے ساتھ لے گئے ہیں۔ وہ ہمارے گھر کے سیکیورٹی کیمرے، میری بیٹی کا لیپ ٹاپ اور موبائل بھی ساتھ لے گئے۔
شیریں مزاری کے مطابق’وہ میری بیٹی کو گھسیٹتے ہوئے لے گئے۔ اس سے پہلے وہ پورے گھر میں گھومتے پھرتے رہے۔ میری بیٹی شب خوابی کے لباس میں ملبوس تھی۔ اس نے کہا کہ مجھے کپڑے تبدیل کرلینے دو لیکن وہ اسے گھسیٹتے ہوئے لے گئے‘۔
’ ان کے پاس کوئی وارنٹ تھے نہ ہی انہوں نے گرفتاری کے لیے قانونی طریقہ اختیار کیا۔ یہ تو ریاستی فاشزم ہے۔ یاد رہے کہ گھر میں صرف ہم دونوں خواتین رہتی ہیں۔ یہ اغوا کا کیس ہے‘۔
