نگراں وفاقی وزیر برائے ثقافت و قومی ورثہ جمال شاہ لاہور میں ٹی وی، اسٹیج، تھیٹر اور فلم کے نامور اداکار فردوس جمال کی رہائش گاہ گئے۔ وفاقی وزیر نے کینسر کے مرض میں مبتلا فردوس جمال کی عیادت کی اور ان کی جلد صحت یابی کے لیے نیک تمناؤں کا اظہار کیا ۔
جمال شاہ نے پرائیڈ آف پرفارمنس فردوس جمال کی فن کے لیے طویل خدمات کو سراہا اور انہیں ملک کے لیے عظیم اثاثہ قرار دیا۔
وفاقی وزیر جمال شاہ لاہور میں لیونگ لیجنڈ استاد بشیر احمد کے گھر بھی گئے۔ منی ایچر، پینٹر استاد بشیر احمد صحت کی خرابی کا شکار ہیں۔ جمال شاہ نے ان کی بھی عیادت کی اور جلد صحتیابی کے لیے نیک خواہشات کا اظہار کیا۔
جمال شاہ نے استاد بشیر احمد کو روایتی انداز سے ہٹ کر کام کر کے دنیا بھر میں پہچان بنانے اور عمدہ کام کی تعریف کی۔
