پاکستان پیپلزپارٹی کے رہنماؤں نے کہا ہے کہ عام انتخابات آئین میں دی گئی 90 روز کی مدت کے اندر کرائے جائیں۔
چیف الیکشن کمشنر سے ملاقات کے بعد میڈیا سے گفتگو کرتے ہوئے سابق وزیراعلیٰ سندھ مراد علی شاہ، نیئر بخاری، شیری رحمان اور نوید قمر نے کہاکہ ہم نے اپنا موقف الیکشن کمیشن کے سامنے رکھ دیا ہے۔
مزید پڑھیں
مراد علی شاہ نے کہاکہ الیکشن کمیشن کے جو خدشات ہیں ان کا جواب وہی دے سکتے ہیں، انتخابات وقت پر نہ کرانے کی کوئی وجہ نہیں۔
نیئر بخاری نے کہاکہ انتخابات کی تاریخ دینا بہت ضروری ہے، آئین کے آرٹیکل 224 میں دی گئی مدت کے اندر انتخابات ہونے چاہییں۔
انہوں نے کہاکہ الیکشن کمیشن نے ہمارا موقف سنا اور کہا کہ میٹنگ کر کے جواب سے آگاہ کریں گے۔
اس موقع پر شیری رحمان کا کہنا تھا کہ چیف الیکشن کمشنر کے ساتھ بہت خوشگوار ماحول میں میٹنگ ہوئی ہے اور ہم نے اپنے خدشات سامنے رکھے ہیں۔ کیوں کہ فوری انتخابات وقت کی ضرورت ہیں۔
میڈیا سے گفتگو کرتے ہوئے نوید قمر نے کہاکہ ہم نے الیکشن کمیشن کو کہا ’حلقہ بندیوں کے لیے اتنا وقت درکار نہیں جتنا کہا گیا ہے‘۔