بڑھتی مہنگائی کے سبب ملک میں عام آدمی کی پریشانی میں روز بروز اضافہ ہوتا جارہا ہے اور ہر کوئی بے سکونی کا شکار ہے تاہم ایسے میں کوئٹہ کے ایک ٹریفک پولیس اہلکار نے ذہنی سکون کے حصول کا نسخہ تلاش کرلیا۔
ٹریفک پولیس میں بطور کانسٹیبل اپنے فرائض سر انجام دینے والے غلام محی الدین اپنی ڈیوٹی ایمانداری سے نبھانے کے ساتھ ساتھ پرندوں کے لیے دانہ پانی کا بھی بندوبست کرتے ہیں۔
غلام محی الدین ہر روز ایک کلو دانہ اپنی جیب سے خرید کر کوئٹہ کے اتحاد چوک پر پرندوں کو ڈالتے ہیں۔ انہوں نے بتایا کہ وہ گزشتہ کئی ماہ سے اسی طرح پرندوں کی خدمت کر رہے ہیں۔
انہوں نے وی نیوز سے گفتگو کرتے ہوئے بتایا کہ اس کارخیر کو اس لیے سر انجام دیتے ہیں کیونکہ اس سے انہیں قلبی و ذہنی سکون ملتا ہے۔ ان کا کہنا تھا کہ انہیں ان پرندوں سے اب ایسا لگاؤ ہو گیا ہے کہ یہ انہیں اپنے بچوں کی مانند مانند لگتے ہیں۔
غلام محی الدین نے کہا کہ ’ میں اکثر پرندوں کے لیے دانہ اپنی مدد آپ کے تحت خریدتا ہوں لیکن میرے عمل کو دیکھتے ہوئے لوگ بھی اب مجھے پرندوں کے لیے دانہ دے جاتے ہیں‘۔
انہوں نے کہا کہ خدا باری تعالیٰ کا فرمان ہے کہ تم زمین والوں پر رحم کرو آسمان والا تم پر اپنی رحمت کرے گا۔
