وفاقی تحقیقاتی ادارے ایف آئی اے کے اینٹی کرپشن سرکل پشاور نے اختیارات کے ناجائز استعمال اور کرپشن میں ملوث فیڈرل سیڈ اینڈ رجسٹریشن ڈیپارٹمنٹ کے آفیسر کو گرفتار کر لیا ہے۔
ترجمان ایف آئی اے کے مطابق ڈپٹی ڈائریکٹر سعداللہ خان کی ہدایت پر اسسٹنٹ ڈائریکٹر سراج محمد نے ملزم کو پشاور سے گرفتار کیا۔ سخی محمد کرپشن، رشوت اور اختیارات کے ناجائز استعمال میں ملوث تھا۔
ملزم سخی محمد فیڈرل سیڈ اینڈ رجسٹریشن ڈیپارٹمنٹ خیبرپختونخوا میں بطور ریجنل ڈائریکٹر تعینات رہا۔ سخی محمد سیڈ کمپنیوں سے رشوت لینے میں ملوث تھا۔
ایف آئی اے کے مطابق ملزم رشوت کے لیے اپنی زوجہ، بچوں اور رشتہ داروں کے بینک اکاؤنٹس استعمال کرتا تھا۔ ملزم کے خلاف کرپشن کے حوالے سے ٹھوس شواہد حاصل کر لیے گئے۔
ایف آئی اے نے ملزم کے خلاف تفتیش کا آغاز کر دیا ہے۔
