مہنگائی سے پریشان عوام پر ایک اور پٹرول بم گرانے کی تیاری، پٹرولیم قیمتوں میں یکم ستمبر سے ممکنہ اضافے کا امکان ظاہر کیا جا رہا ہے۔
ذرائع کے مطابق اوگرا نے سمری حکومت کو ارسال کر دی ہے جس میں پٹرول کی قیمت 10 سے 15 روپے فی لیٹر تک بڑھانے کی تجویز دی گئی ہے۔
قیمتوں میں اضافے کی حتمی منظوری وزارت خزانہ نگراں وزیراعظم انوار الحق کاکڑ کی مشاورت سے دے گی، اور پٹرولیم مصنوعات کی قیمتوں میں اضافہ آئندہ 15 دنوں کے لیے کیا جائے گا۔
پاکستان میں نگران حکومت نے اپنے قیام کے پہلے ہی ہفتے پیٹرول کی قیمتوں میں ساڑھے سترہ اور ڈیزل کی قیمتوں میں بیس روپے اضافے کا اعلان کرتے ہوئے ملک میں پیٹرولیم مصنوعات کی قیمتوں کو ملکی تاریخ کی بلند ترین سطح پر پہنچا دیا ہے۔
دوسری طرف عوام کا احتجاج زوروں پر ہے اور سوشل میڈیا پر یہ مطالبہ زور پکڑ رہا ہے کہ غریب کی بجائے امیر پر بوجھ ڈالا جائے، بجلی کے بھاری بھرکم بلوں کے خلاف عوام پہلے ہی سڑکوں پر ہیں شہر شہر مظاہرے ہو رہے ہیں جبکہ پیپلز پارٹی نے بجلی کے بلوں میں اضافے کے خلاف ریلی بھی نکالی ہے، اور حکومت سے بلوں میں اضافے کا فیصلہ واپس لینے کا مطالبہ بھی کیا جا رہا ہے۔
پٹرولیم مصنوعات کی قیمتوں میں اضافے کی خبر سنتے ہی سوشل میڈیا پر صارفین کا شدید رد عمل سامنے آیا۔
ایک صارف نے لکھا کہ ستمبر آنے دو پیٹرول، ڈیزل کے ساتھ ساتھ بجلی کے یونٹ بھی بڑھ جائیں گے۔
ستمبر آنے دو پیڑول اور ڈیزل کے ساتھ ساتھ بجلی کے یونٹ بھی بڑھ جائے گی۔#PakistanEconomy #AsiaCup #ElectricityBills #PetrolDieselPrice #Dollar
— 2Vile_Anas😈 (@Anas0481) August 31, 2023
چوہدری اسلم نامی صارف نے پٹرول کی قیمت کا موازنہ ڈالر کی قدر سے کیا اور کہا کہ پاکستان میں ڈیزل اور پٹرول کی قیمتیں ڈالر کا مقابلہ کریں گی اور یہ 350 سے بھی اوپر جائیں گی۔
پاکستان میں ڈیزل پٹرول اور ڈالر کی قیمتیں مقابلہ کریں گی یہ 350 سے اوپر جائیں گی https://t.co/lxbJymGoCL
— ch Aslam PTI (@Mohamme86350809) August 31, 2023
صحافی جمال عبداللہ نے کہا کہ بجلی کے بلوں میں ریلیف دینے والے آج پٹرولیم مصنوعات کی قیمتوں میں بھی اضافہ کرنے جا رہے ہیں، انہوں نے مزید کہا کہ روسی تیل جس کے بڑے چرچے تھے کہ اس سے ہر صورت فوائد ملیں گے تو اس کے فوائد کب ملنا شروع ہوں گے؟
بجلی کے بلوں میں ریلیف دینے والے آج پیٹرولیم مصنوعات کی قیمتوں میں اضافہ کرنے جارہے ہیں؟؟؟
ویسے یاد آیا کہ روسی تیل کی بڑے چرچے تھے۔ اس کے فوائد کب سے ملنا شروع ہوں گے؟
— Jamal Abdullah Usman (@JamalAbdullahPk) August 31, 2023
پاکستان میں بڑھتی ہوئی مہنگائی اور حالات سے دلبرداشتہ صارف ماریہ انجم لکھتی ہیں کہ اگر مجھے افریقہ کے جنگل کا ویزہ ملے تو میں وہاں بھی چلی جاؤں گی۔
مجھے افریقہ کے جنگل کا ویزہ بھی ملے تو میں چلی جاؤں#PetrolDieselPrice
— Maria Anjum (@MariaAnjum11) August 31, 2023
ایک صارف نے کہا جس طرح کے پاکستان کے حالات ہو چکے ہیں اس سے بہتر تھا ہم قرض نہ ہی لیتے۔
جس طرح کے ملک کے حالات ہو چکے ہیں ، اس سے بہتر تھا کہ ہم قرض ہی نہ لیتے ۔۔۔۔۔ 😭😭😭
#PetrolDieselPrice— Azhar (@azhar23456789) August 31, 2023
واضح رہے کہ رواں ماہ کے آغاز کے بعد سے اب تک مجموعی طور پر پیٹرول کی قیمت میں 37 روپے 45 پیسے، جبکہ ڈیزل کی قیمت میں لگ بھگ 40 روپے کا اضافہ کیا گیا ہے۔
بجلی کی قیمتوں میں ہوشربا اضافے سے عوام کا احتجاج جاری ہے اور اب پٹرولیم مصنوعات کی بڑھتی ہوئی قیمتیں عوام کا بھرکس نکال رہی ہیں۔